Հայաստանը մենք ենք

Սեպտեմբերի 26, 2016

Դպրոցական անցուդարձ

«Ահա դարերի խորքից, պատերազմներից ու ասպատակումներից ավերված ճամփաներով, հրի ու սրի միջով, դեպի մեզ է գալիս մի հոգնած, վիրավոր, բայց համառ ու տոկուն ճամփորդ»։

ՀՀ Արարատի մարզի Սայաթ-Նովայի միջնակարգ դպրոցում տեղի ունեցավ ՀՀ անկախության 25 ամյակին նվիրված «Հայաստանը մենք ենք» խորագրով թատերականացված ներկայացում՝ ըստ Գևորգ Էմինի «Հավերժի ճամփորդը» ստեղծագործության:

Որպես Հայաստանը շենացնող, սյուն ու հենարան հանդիսացող սիմվոլիկ կերպարներ՝ ընտրվել էին գյուղացին, զիվորականը, բանաստեղծը, աշակերտը, գիտնականը, բանվորը, մանուկը, ովքեր ամբողջ ներկայացման ընթացքում արարում էին, աշխատում, ստեղծում բարիքներ Հայաստանի համար և պատմում իրենց չքնաղ հայրենիքի մասին:

Գյուղացին իր աճեցրած խաղողի որթի բերքից գինի էր քամում: Զինվորը միշտ կազմ ու պատրաստ պաշտպանում էր հայրենի եզերքը: Պատանի բանաստեղծը նորանոր բանաստեղծություններ էր գրում և նվիրում հայրենիքին: Երիտասարդ բանվոր մասնագետը սարքավորումներ էր նորոգում և ստեղծում՝ հանուն հայրենիքի շենացման: Գիտնականը էլեկտրոն էր սանձում, ատոմից լույս քամում և մետաքսի նուրբ թելեր հանում նույնիսկ հայոց բիրտ քարերից... Աշակերտը մշտապես կարդում, սովորում և ուսանում էր, որպեսզի դառնա վաղվա Հայաստանի ապագա լավագույն մասնագետը: Իսկ փոքրիկ մանուկը՝ Հայաստանի շարունակողն ու ժառագորդը, իր կենսուրախ խաղով լցնում էր ամբողջ պատկերը:

Ներկայացման վերջում դեպի մեզ եկավ Հայաստանը՝ որպես դարերի խորքից եկած հավերժի ճամփորդ, որը դեպի դարերն է գնում և որի երթը վերջ ու վախճան չունի, քանի դեռ գեթ մի հայ է ապրում այս հողագնդում, այս հավերժական արևի ներքո...

Հայաստանը ինքը կյանքն է, հարատևումը, անմահությունը...

Նա՛ է, ով միշտ մահվան մեջ է ապրել, բայց մահ չունի...

Ներկայացման գլխավոր նպատակը այն էր, որ յուրաքանչյուր հայ ի´նքն է Հայաստան կերտողը, ի´նքն է Հայաստանի շունչն ու հոգին, և Հայաստանը յուրաքանչյուր հայի տունն է: