Ղազախստանի գործարար առաքելության հետ քննարկվել են կրթական տեխնոլոգիաների և թվայնացման բնագավառում համագործակցության հեռանկարները

Մարտի 29, 2024

Միջազգային լուրեր Լուրեր կազմակերպություններից

 Մարտի 26-29-ը գործարար առաքելությամբ Ղազախստանից Հայաստան են ժամանել տեղեկատվական տեխնոլոգիաների, շինարարության, զբոսաշրջության և լոգիստիկայի ոլորտները ներկայացնող ավելի քան 20 ընկերությունների ներկայացուցիչներ։

Ղազախստանի Հանրապետության գործարար առաքելության ներկայացուցիչներն այսօր հյուրընկալվել են ՀՀ կրթության, գիտության, մշակույթի և սպորտի նախարարությունում:

Հանդիպմանը ներկա են եղել ԿԳՄՍՆ Արտաքին կապերի և սփյուռքի վարչության պետ Արկադի Պապոյանը, Ռազմավարական պլանավորման և մոնիթորինգի վարչության պետ Ռոբերտ Ստեփանյանը, Բարձրագույն կրթության և գիտության կոմիտեի գլխավոր քարտուղարի տեղակալ Կարեն Ղարիբյանը, Կրթական տեխնոլոգիաների ազգային կենտրոնի տնօրեն Արտակ Պողոսյանը, Աստանայի դիվանագիտական ​​ակումբի նախագահ Կայիրբոլատ Սախմետովը, Ղազախստանի մի շարք տնտեսվարողներ:

Արտաքին կապերի և սփյուռքի վարչության պետ Արկադի Պապոյանն ընդգծել է երկու երկրների համագործակցության մեծ ներուժը հատկապես ԿԳՄՍՆ համակարգման ոլորտներում:

Հանդիպման ընթացքում, մասնավորապես, քննարկվել են կրթական տեխնոլոգիաների բնագավառում համատեղ նախաձեռնությունների իրականացման հնարավորությունները, թվային տեխնոլոգիաների կիրառումը նախադպրոցական, հանրակրթական և բարձրագույն ուսումնական հաստատություններում, հանրակրթական դպրոցներում վարչարարության թվայնացման և գործընթացների ավտոմատացման հնարավորությունը, ինչպես նաև կրթության թվայնացման բնագավառում փոխհամագործակցությունը՝ մասնավոր ընկերությունների հետ համագործակցության հեռանկարով:

Կրթական տեխնոլոգիաների ազգային կենտրոնի տնօրեն Արտակ Պողոսյանը տեղեկացրել է՝ ՀՀ-ում վերջին տարիներին կրթության ոլորտում թվայնացման ուղղությամբ նկատելի աշխատանք է կատարվել: Արդեն իսկ թվայնացված են սովորողների ընդունելության, հաստատությունից հաստատություն տեղափոխման, գնահատման, ուսուցիչների ատեստավորման, ավարտական վկայականների` ատեստատների տրամադրման և մի շարք այլ գործընթացներ:

Ղազախական կողմի ներկայացուցիչները ներկայացրել են իրենց երկրի փորձը՝ ընդգծելով, որ իրենք համագործակցում են Ղազախստանի լուսավորությոն նախարարության հետ:

Կողմերը կարևորել են համագործակցությունը հանրակրթական ուսումնական հաստատություններում թվայնացման գործընթացների, կրթության ոլորտում թվային տեխնոլոգիաների զարգացման, համատեղ ծրագրային նախաձեռնությունները՝ պատրաստակամություն հայտնելով այդ ուղղությամբ առաջարկներ մշակել:

Նյութի աղբյուրը. ՀՀ կրթության, գիտության, մշակույթի և սպորտի նախարարություն