««Ընտանիք»-ն անիվների վրա» կրթամշակութային միջոցառումների շարք

Սեպտեմբերի 6, 2024

Լուրեր կազմակերպություններից

ՀՀ ԿԳՄՍ նախարարության աջակցությամբ  «Ընտանիք» կենտրոնը մեկնարկեց  ««Ընտանիք»-ն անիվների վրա» կրթամշակութային միջոցառումների շարքը։ Ծրագրի առաջին փուլում  օգոստոսի 26-ից 28-ը անցկացվեցին՝ «Արտադպրոցական կրթության կարևորությունը և հիմնախնդիրները» թեմայով դասընթացներ։

Եռօրյա հագեցած տեսական և գործնական դասընթացներին մասնակցեցին Շիրակի մարզի 14 համայնքների և Ջավախքի կրթամշակութային հաստատությունների 20 մանկավարժներ։ «Ընտանիք» կենտրոնի օրինակով ներկայացվեց արտադպրոցական կրթական հաստատության մոդելի կազմակերպման առանձնահատկությունները, անհատական և շերտավոր դասավանդման կարևորությունը, լրացուցիչ կրթադաստիարակչական բնույթի գործունեության իրականացման մեթոդները։ Քննարկվեց, թե ինչու՞ է անհրաժեշտ համայնքներում իրականացնել արտադպրոցական լրացուցիչ կրթություն, ապահովել դեռահասների ազատ ժամանցի կազմակերպումն ու թե ինչպե՞ս նպաստել վերջիններիս նախամասնագիտական կողմնորշմանը, ստեղծագործական ունակությունների, հմտություների բացահայտմանը, գեղագիտական, ֆիզիկական և ռազմահայրենասիրական դաստիարակության զարգացմանը և կիրառական գիտելիքների ձևավորմանը։  Տեսական դասընթացներին մասնակիցները կատարեցին ինքնուրույն և թիմային աշխատանքներ, կազմեցին կրթամշակութային ծրագրեր, աշխատանքային պլաններ։ Յուրաքանյուր թիմ ներկայացրեց իր աշխատանքը, կարևորելով այն մասնագիտությունները, որոնք համապատասխանում են իրենց համայնքների կարիքներին։

Գործնական դասերն անցկացվեցին կենտրոնի մասնագիտական խմբակներում, յուրաքանչյուր մասնակցի տրվեց անհատական մոտեցում սովորելու նախընտրած մասնագիտության հմտությունները։

Եռօրյա դասընթացն ավարտվեց կլոր սեղան քննարկմամբ, որին մասնակցեցին նաև կենտրոնի մանկավարժները, կիսվեցին արտադպրոցական կրթության իրենց փորձով, որոնք ծրագրի մասնակիցները հետագայում կարող են ծառայեցնել սեփական համայնքների դեռահասների զարգացման գործին։

Դասընթացի առանցքային խնդիրների, արտադպրոցական կրթության կարևորության մասին, մասնակիցներն իրենց կարծիքներն արտահայտեցին հարցաթերթիկների, գնահատման թերթիկների միջոցով. 

 «Այսօր մենք կանգնած ենք լրջագույն խնդրի առաջ, դա մեր ազգային ինքնության, մշակութային դիմագծի պահպանումն ու տարածումն է: Այս առումով եռօրյա դասընթացի միջոցով բացահայտեցինք մեկ փաստ, որ վերոնշյալ խնդիրների լուծման ուղղությամբ կարևոր դերակատարում ունեն արտադպրոցական կրթական հաստատությունները: «Ընտանիք» կենտրոնն իր օրինակով ներկայացրեց, թե որքան մեծ առաքելություն են կատարում սերունդների կրթամշակութային մակարդակը զարգացնելու ուղղությամբ: Ծրագիրն անշուշտ նպաստում է համայնք-մարզկենտրոն կապի, սաների, մանկավարժների միջև մասնագիտական փորձի փոխանակման, մասնագիտության ընտրության հարցում ճիշտ կողմնորոշվելուն: Շնորհակալ ենք, որ նման ծրագրեր է իրականացնում այս կենտրոնը, և որից անմասն չմնացինք նաև մենք»,-նշված է Շիրակի մարզի Առափի համայնքի միջնակարգ դպրոցի մանկավարժ Ծաղիկ Հակոբյանի հարցաթերթիկում:

Հեղինակ՝ Էլիզա Ֆրանգուլյան