««Ընտանիք»-ն անիվների վրա» կրթամշակութային ծրագիր․ երկրորդ փուլ

Նոյեմբերի 4, 2024

Լուրեր կազմակերպություններից

ՀՀ ԿԳՄՍՆ «Ընտանիք» մանկապատանեկան ստեղծագործական կենտրոնի ««Ընտանիք»-ն անիվների վրա» կրթամշակութային ծրագրի երկրորդ փուլում կենտրոնի՝ ազգային արվեստի և արհեստի ճյուղերի մասնագիտական խմբակների մանկավարժներն ու շնորհալի սաները, Շիրակի մարզի բարձրադիր, սահմանամերձ 14 համայնքներում մասնագիտական կողմնորոշման դասեր անցկացրին: Համայնքաբնակ դեռահասները, պատանիները հաղորդակից դարձան ազգային մշակույթին, գործնական դասերի միջոցով յուրացրեցին արվեստի գործերի ստեղծման կատարողական տեխնիկան: Կենտրոնում սաների ձեռք բերած մասնագիտական գիտելիքների փոխանցումը հասակակիցներին մեծ ոգևորություն առաջացրեց մասնակիցների մոտ: Պատանիներն իրենց նախընտրելի մասնագիտություններում բացահայտեցին սեփական ներուժն ու կարողությունները: Ծրագիրը նպաստեց, ոչ միայն համայնքաբնակ դեռահասների մասնագիտական կողմորոշմանն, այլև համայնքներում մշակութային կյանքի աշխուժացմանը: Աշոցքում, Փոքր Սարիարում, Ախուրիկում, Առափիում, Գետքում, Մայիսյանում, Հացիկում, Փոքրաշենում, Ալվարում, Լանջիկում, Տուֆաշենում, Փանիկում, Սարալանջում, Վարդաքարում արհեստի և արվեստի ճյուղերի խմբակներ գրեթե չեն գործում, հետևաբար ««Ընտանիք»-ն անիվների վրա» կրթամշակութային ծրագիրը միտված է նաև լրացնելու բացը, տարածելու և պահպանելու ազգային մշակույթը: Հարցաթերթիկների միջոցով դեռահասները կիսվեցին իրենց տպավորություններով, ձեռք բերած հմտություններով:

««Ընտանիք»-ն անիվների վրա» կրթամշակութային ծրագրի շրջանակներում մասնագիտական կողմնորոշման և վարպետության դասեր անցկացվեցին Ջավախք աշխարհի կրթամշակութային հաստատություններում:

Եռօրյա այցի առաջին կանգառն Ախալցիխեի երիտասարդական կրթամշակութային կենտրոնում էր: «Ընտանիք» կենտրոնի մանկավարժներն ու շնորհալի սաները՝ պարարվեստի, գեղանկարչության, վիտրաժային նկարչության, կարպետագործության, թաղիքագործության, կավագործության, ուլունքագործության, ասեղնագործության, կվիլինգի, բատիկի վարպետության դասերն համեմեցին՝ ազգային ավանդական երգ ու պարով։ Վարպետաց դասերը մշակութային երկխոսություն է նաև ջավախահայ սաների համար, սա լավագույն հնարավորությունն է սովորել այն, ինչ իրենց կենտրոնում չեն ուսուցանում:

Հայկական դուդուկի ու դհոլի խրոխտ հնչյուններով, կենտրոնների մանկավարժները, սաներն ու ջավախահայ մեր հայրենակիցները միասնական շուրջ պար բռնեցին Ախալցիխեի կենտրոնական հրապարակում: 30 տարի անց հայկական նվագարանների կատարումը Ախալցիխեի Ռուսթավելի հրապարկում ևս մեկ անգամ փաստեց համախմբվածության, միասնական ոգու և ազգապահպանության մասին: «Ընտանիք» կենտրոնի դեպի Ջավախք այցն համընկավ Սուրբ Թարգմանչաց տոնի հետ: Ախալքալաքի երիտասարդական կենտրոնում ներկայացվեց տոնի հոգևոր-մշակութային խորհուրդը, անցկացվեց վիկտորինա, որն ավելի շատ եկեղեցական, թարգմանչական արվեստի կարևորության մասին հարցուպատասխանի միջոցով գիտելիքների ամրապնդմանն էր ուղղված: Ախալքալաքի, Նինոծմինդայի և ««Ընտանիք» կենտրոնի սաներն համատեղ գեղարվեստական ելույթներով արժևորեցին տոնի կարևորությունը: Միջոցառմանն իրենց ներկայությամբ պատվել էին Սամցխե- Ջավախքի և Ծալկայի ընդհանուր առաջնորդական փոխանորդ ՝ Հոգեշնորհ Տեր Նշան վարդապետ Հմայակյանը, Ախալքալաքի Սուրբ Խաչ եկեղեցու հոգևոր հովիվ՝ Արժանապատիվ Տեր Նարեկ քահանա Տիգրանյանը: Վերջիններս կարևորեցին Հայաստան-Ջավախք ամուր բարեկամական կամուրջն ու ազգային

դիմագծի պահպանմանն ուղղված այցերն ու միջոցառումները: Միջոցառումն ամփոփվեց մասնագիտական կողմնորոշման, վարպետաց դասերով: Սաները ծանոթացան արվեստի ու արհեստի ճյուղերին, գործնական աշխատանքների միջոցով նախընտրած մասնագիտություններում նոր գիտելիքներ ձեռք բերեցին: Կրթադաստիարակչական այցերը միայն նպաստում են սաներին ամուր կապելու հայ մշակույթի ակունքներին:Եռօրյա այցը դեպի Ջավախք ավարտվեց Գանձայում՝ տերյանական պոեզիայով ու շնչով հագեցած: Մեծ բանաստեղծի՝ Վահան Տերյանի հայրենի գյուղի տուն-թանգարանում սաները ծանոթացան բանաստեղծի նիստուկացին, կյանքի և ստեղծագործական ուղուն։ Թանգարանում ցուցադրված են բանաստեղծի երկերի հայերեն, ռուսերեն, և այլ լեզուներով հրատարակություններ, տերյանագիտական ուսումնասիրություններ, նրա տեքստերով գրված երաժշտության նոտաներ։ Թանգարանի հարևանությամբ գտնվում է՝ Սուրբ Կարապետ եկեղեցին, որը 1859 թվականին կառուցել է Տերյանի պապը՝ տեր Գրիգորը։ Եկեղեցում ««Ընտանիք» մանկապատանեկան ստեղծագործական կենտրոնի մանկավարժներն ու սաներն օրհնություն ստացան հոգևոր հովվից, միասնական աղոթք բարձրացրեցին առ Աստված: