ԿՐԹԱԿԱՆ
ՖՈՐՈՒՄ
ՖՈՐՈՒՄ
ՊԱՇԱՐՆԵՐԻ
ՇՏԵՄԱՐԱՆ
ՇՏԵՄԱՐԱՆ
ՀԵՌԱՎԱՐ
ՈՒՍՈՒՑՈՒՄ
ՈՒՍՈՒՑՈՒՄ
ԻՆՏԵՐԱԿՏԻՎ
ՈՒՍՈՒՑՈՒՄ
ՈՒՍՈՒՑՈՒՄ
ԿԿՏ
ՀԱՄԱԿԱՐԳ
ՀԱՄԱԿԱՐԳ
Ջերմուկում կայացել է Համահայկական ձմեռային երկրորդ խաղերի բացման հանդիսավոր արարողությունը, որին ներկա են եղել ՀՀ նախագահ Վահագն Խաչատուրյանը, ՀՀ վարչապետի աշխատակազմի ղեկավար Արայիկ Հարությունյանը, Կրթության, գիտության, մշակույթի և սպորտի նախարար Ժաննա Անդրեասյանը, ԱԺ փոխնախագահ Հակոբ Արշակյանը, Երևանի քաղաքապետ Տիգրան Ավինյանը, ՀԽՀԿ նախագահ Իշխան Զաքարյանը։
Երկրորդ անգամ անցկացվող խաղերին ավելի քան 1340 պատվիրակ է մասնակցում աշխարհի 18 պետությունների 88 քաղաքներից:
Համահայկական խաղերը կսպասարկեն 76 մրցավարներ: Խաղերի գլխավոր մրցավարը Դավիթ Բաղումյանն է:
Բացման հանդիսավոր արարողությունից հետո Համահայկական ձմեռային խաղերի դրոշը բարձրացրել է Հռիփսիմե Խուրշուդյանը, կրակը վառել է Վարազդատ Լալայանը։
Ողջույնի խոսքով հանդես է եկել ՀՀ նախագահ Վահագն Խաչատուրյանը՝ ազդարարելով Համահայկական ձմեռային երկրորդ խաղերի մեկնարկը:
«Համահայկական խաղերը հատուկ նշանակություն ունեն մեր ժողովրդի համար, քանի որ միավորում են աշխարհասփյուռ հայությանը՝ սպորտի և մրցակցության ոգով: Հայաստանի հրաշալի ձմեռային բնությունը և լեռնային գեղատեսիլ վայրերը լավագույն միջավայր են ստեղծում այս մարզական տոնի համար: Մեր երկիրը հպարտությամբ է հյուրընկալում աշխարհի տարբեր երկրներից ժամանած հայ մարզիկներին, որոնք իրենց մասնակցությամբ նպաստում են հայկական սպորտային ավանդույթների զարգացմանը, ինչպես նաև նոր խթան են դառնում Հայաստան-Սփյուռք նոր կապերի ամրապնդման համար»,- ասել է ՀՀ նախագահը:
Միջոցառման անցկացումը դրական է գնահատել ՀՀ վարչապետի աշխատակազմի ղեկավար Արայիկ Հարությունյանը։
«11 տարի ընդմիջում է եղել, և երկու տարի առաջ, երբ շատ հաջող ամառային խաղեր անցկացրինք, որոշեցինք անպայման վերականգնել նաև ձմեռային խաղերը։ Չնայած բոլոր դժվարությունների՝ որոշեցինք անցկացնել Ջերմուկում, և այսօրվա միջոցառումն ապացուցեց, որ ճիշտ որոշում է կայացվել։ Գործադիր կոմիտեն բավականին մեծ աշխատանք է կատարել, բայց նաև մարզիկների հետաքրքրությունն էր մեծ։ Նրանք տարբեր երկրներից են, և երբ վերադառնալով պատմում են իրենց դրական տպավորությունների մասին, նոր մարդիկ են ներգրավվում. նախորդ անգամների համեմատ մասնակիցների թիվը երեք անգամ մեծացել է։ Մասնակիցների մի մասն Հայաստանում առաջին անգամ է գտնվում։ Ջերմուկ գալու նպատակներից մեկն էլ այն էր, որ հյուրերը, բացի Երևանից, տեսնեն նաև մեր մյուս գեղեցիկ քաղաքները։ Խաղերի հաջող հերթականությունը հուշում է, որ շարունակականություն ենք ապահովելու»,- ասել է նա։
ԿԳՄՍ նախարար Ժաննա Անդրեասյանը, կարևորելով տևական դադարից հետո Համահայկական ձմեռային խաղերի անցկացումը, ընդգծել է ձմեռային մարզաձևերի զարգացման անհրաժեշտությունը: Ժաննա Անդրեասյանի խոսքով՝ Համահայկական 2-րդ ձմեռային խաղերի բացումը բացառիկ տոնակատարության է վերածվել։
«Հատկապես տպավորիչ էր Ջերմուկում ունենալ այսպիսի բեմ և արարողություն։ Իհարկե սպորտում հաղթանակը շատ կարևոր է, բայց կարծում եմ՝ բոլոր մասնակիցների համար այստեղ գտնվելն արդեն իսկ հաջողություն է։ Համահայկական երկրորդ ձմեռային խաղերի անցկացումը կարևոր է հատկապես սպորտի ռազմավարության համատեքստում, որտեղ ձմեռային մարզաձևերի զարգացումը հատուկ նշանակություն ունի։ Ապրիլին Երևանում անցկացվելու է Հոկեյի D դիվիզիոնի աշխարհի առաջնությունը. կհյուրընկալենք թիմեր 6 երկրներից։ Նման խաղերի կազմակերպումը ձմեռային մարզաձևերի հանդեպ հանրային հետաքրքրությունը կավելացնի, ինչը շատ կարևոր է»,- ասել է նախարարը։
Համահայկական խաղերի համաշխարհային կոմիտեի նախագահ Իշխան Զաքարյանն իր ելույթում նշել է. «Տարեցտարի ընդլայնվող աշխարհագրությունը և մասնակիցների շեշտակի ավելացումը Համահայկական խաղերի գաղափարը դարձրել են միասնության, սիրո ու համերաշխության իսկական տոն։ Առաջին խաղերին ունեինք համեստ մասնակցություն. 11 պետություն, 22 քաղաք, 437 մասնակից։ Այսօր պատկերն անհամեմատելի է. 18 պետություն, 91 քաղաք, 1348 մասնակից։ Սա հրաշալի արդյունք է»։
Համահայկական ձմեռային երկրորդ խաղերը կանցկացվեն հոկեյ, դահուկավազք, լեռնադահուկային սպորտ, սնոուբորդ, շախմատ, ձնամարտ և սպորտային պարեր մարզաձևերից:
Նյութի աղբյուրը. ՀՀ կրթության, գիտության, մշակույթի և սպորտի նախարարություն
