Բնագիտամաթեմատիկական առարակաների օրերը Վանաձորի թիվ 23 դպրոցում

Դեկտեմբերի 27, 2017

Դպրոցական անցուդարձ

Դեկտեմբերի 5-19-ը Վանաձորի ծովակալ Իսակովի անվան թիվ 23 հիմնական դպրոցում բնագիտամաթեմատիկական առարկաների օրեր էին, որի շրջանակներում կատարվեցին մի շարք հետաքրքիր աշխատանքներ: Մասնավորապես, ուսուցիչներն իրականացրեցին  փորձարարական դասեր, կարդացին հետաքրքիր զեկուցումներ: Հատկապես կարևոր էր սկսնակ ուսուցիչների ակտիվ մասնակցությունը: Հայտարարվեց մրցույթ «Երկրաչափական մարմինների կիրառությունը առօրյայում» խորագրով, որին մասնակցեցին դպրոցի 7-9-րդ դասարանների աշակերտները: Ներկայացվեցին բազմազան, հետաքրքիր լուծումներով մոդելներ: Արդյունքում հաղթող ճանաչվեց VIIIբ դասարանի աշակերտուհի Աիդա Արսենյանի աշխատանքը:

Հետաքրքիր նորություններով թարմացվեց առարկայական ստենդը:

Դեկտեմբերի 19-ին տեղի ունեցավ ավարտական միջոցառումը՝ «Ի՞նչ, որտե՞ղ, ե՞րբ» ինտելեկտուալ խաղը: Դպրոցի ութերորդ դասարանների պատանի գիտակների թիմը/ Արեն Խառատյան, Արմեն Սահակյան, Աստղիկ Սիրունյան, Արտյոմ Մանուկյան, Վաչե Վարդանյան, Շահանե Խաչատրյան/ խաղում էր «հեռուստադիտողների» թիմի դեմ՝ ի դեմս բնագիտամաթեմատիկական մասնախմբի ուսուցիչների և դպրոցի շրջանավարտ ուսանողների: Խաղի ամբողջ աուրան հնարավոր էր դարձել ստեղծել նույնիսկ ամենափոքր մանրամասները հաշվի առնելու շնորհիվ /համապատասխան երաժշտություն, խաղավար, հաղորդավարի ձայն, սև արկղ և այլն/:

Միջոցառումը իր տեսակով նախադեպ չուներ, և դա չխանգարեց, որ երեխաները ամբողջությամբ տրվեն խաղին՝ այն դարձնելով ավելի կենդանի և զգացմունքային: Պետք է նշել, որ հարցերն էլ իրենց բնույթով տրամադրում էին դրան և պատասխանելու համար գիտակներից պահանջվում էր ոչ միայն առարկայական, այլև բազմակողմանի գիտելիքներ, տրամաբանական վերլուծություն և հումորի զգացում:  Արդյունքում գիտակները հաղթեցին 6:4 հաշվով: Լավագույն գիտակ ճանաչվեց Վաչե Վարդանյանը, ով պարգևատրվեց հուշանվերով, իսկ լավագույն հարցը մաթեմատիկայի ուսուցչուհի Թամարա Մելիքսեթյանինն էր: