Բաց դաս. Առաջին օգնության անհրաժեշտությունն արտակարգ իրավիճակներում

Փետրվարի 27, 2018

Դպրոցական անցուդարձ

Գյումրու թիվ 4 արհեստագործական պետական ուսումնարան. «Առաջին օգնության անհրաժեշտությունն արտակարգ իրավիճակներում» թեմայով բաց դաս

Փետրվարի 22-ին Գյումրու թիվ 4 արհեստագործական պետական ուսումնարանի երկրորդ կուրսերի ուսանողների մասնակցությամբ ՆԶՊ և կենսաբանություն առարկաներից անցկացվեց բաց դաս «Առաջին օգնության անհրաժեշտությունն արտակարգ իրավիճակներում» թեմայով:

 Դասի նպատակն էր սովորողների մոտ ձևավորել արտակարգ իրավիճակներում կողմնորոշվելու և առաջին օգնություն ցուցաբերելու կարողություններ:

Նախապես ձևավորված հինգ խմբերը պատրաստել էին զեկույցներ հետևյալ թեմաներով՝ առաջին օգնություն թունավոր կենդանիների խայթոցների, այրվածքների, շնչառական օրգանների ախտահարման, արյունահոսությունների, կոտրվածքների դեպքում: Հաշվի առնելով թեմայի արդիականությունը և ժամանակի պահանջը, մասնակիցները տեսական գիտելիքներին զուգահեռ ցուցադրեցին նաև գործնական կարողություններ: Բազմաթիվ օրինակներն ու թեմային համապատասխան սահիկաշարը դասն ավելի տպավորիչ և ուսանելի դարձրեցին:

Դասի վերջում մասնակիցները պատասխանեցին ներկաների հարցերին՝ հանգելով եզրակացության, որ յուրաքանչյուր քաղաքացի, արժևորելով մարդասիրական վեհ գաղափարները, պարտավոր է տարբեր իրավիճակներում հմուտ գործողություններով փրկել մարդկային կյանքեր,  որքան «ների ուժերն ու թելադրի յուրաքանչյուրի խիղճը»:

Մեթոդմիավորման նախագահ՝  Զ. Նահապետյան