Սեբաստացիների անակնկալ այցը

Փետրվարի 27, 2019

Դպրոցական անցուդարձ

Ամենայն հայոց բանաստեղծի հյուրընկալության մասին լեգենդ դարձաձ պատմությունները լոռեցու համար զարմանալի չեն այնքան, որքան Հայաստան աշխարհի այլ բնագավառների բնակիչների համար, քանզի լոռեցին նույնքան հյուրընկալ է ու հյուրասեր, որքան իր ծոցից դուրս եկած բանաստեղծը: Եվ գուցե քաջատեղյակ այս հյուրընկալությանը՝ հունվարի 23-ին՝ Երևանի Մխիթար Սեբաստացի կրթահամալիրի Արևելյան դպրոցի 4-րդ և 5-րդ դասարանի սաները կրթական փոխանակումներ ծրագրի շրջանակներում այցելեցին Վանաձորի թիվ 23 հիմնական դպրոց: Քսաներեքերորդցիները լոռեցուն հատուկ սիրառատությամբ, պարզ ու խինդով առլեցուն ժպիտով, հարազատի ջերմությամբ դիմավորեցին հյուրերին՝ մատուցելով այն Թումանյանի՝ սիրելի դարձած հերոսների կերպարներով: Հանդիպումը երկուստեք ջերմ էր, անմիջական:

  Սեբաստացիների՝ ավանդույթ դարձած այցելություններից հերթականն այս անգամ Վանաձորի կրթօջախ էր բերել ջերմություն, սրտի խոսք ու երգ: Կրթօջախի պատերի ներսում տեղի ունեցած տաք շփումները, երգն ու ասմունքը, քաղցր զրույցը առանձնահատուկ փայլ հաղորդեցին հանդիպմանը: Հերթական անգամ 23 հիմնական դպրոցում թևածեց հոգևոր լիցքեր ճառագող համընդհանուր խանդավառությունը, որն աստիճանաբար վերափոխվեց ու վերածվեց ընտանեկան տոնի: Սեբաստացիների այս այցելությունը պերճախոս վկայությունն է դարերով ամրագրված ասպնջական լոռեցու կենսակերպը:

  Հյուրերը դատարկաձեռն չէին եկել: Նրանք տնօրեն Տ. Հովսեփյանին սիրով նվիրեցին կրթահամալիրի սաների կողմից պատրաստած խորհրդանշական նվերները, քսաներեքերորդցիները նույնպես նրանց հանձնեցին իրենց ձեռքի աշխատանքներից նմուշներ:

  Փոքրիկ սեբաստացիներին ուղեկցում էին իրենց ուսուցիչներ ընկեր Անահիտը և ընկեր Իվետան: