Նպատակը՝ հնարավորինս անցնցում ապահովել համընդհանուր ներառական կրթության անցումը

Մարտի 13, 2019

Պաշտոնական

Տեղի է ունեցել ՀՀ կրթության և գիտության նախարարի 22.01.2019թ. թիվ 20-Ա/2 հրամանով հաստատված «Երևան քաղաքում առնվազն 4 տարածքային մանկավարժահոգեբանական աջակցության կենտրոնների հիմնադրում» գործողության կատարման ապահովման նպատակով ստեղծված աշխատանքային խմբի հերթական հանդիպումը, որում ներգրավված են ԿԳՆ, աշխատանքի և սոցիալական հարցերի նախարարության, Երևանի քաղաքապետարանի, հասարակական հատվածի ներկայացուցիչներ, ինչպես նաև փորձագետներ: Խմբի նպատակն է հնարավորինս անցնցում ապահովել համընդհանուր ներառական կրթության անցումը Երևան քաղաքում: Խումբն արդեն անցկացրել է շուրջ տասը հանդիպում, որոնց ընթացքում իրականացվել է փաստացի տվյալների հավաքագրում, հատուկ և հանրակրթական դպրոցներում սովորող կրթության առանձնահատուկ պայմանների կարիք ունեցող երեխաների գնահատման արդյունքների ամփոփում: Քննարկվել է նաև Երևանի հատուկ դպրոցները մանկավարժահոգե­բանական աջակցության կենտրոնների վերակազմակերպելու ճանապարհային քարտեզը: Մասնագիտական ճանապարհային քարտեզը վերաբերելու է ոչ միայն երեխաներին, այլ նաև աշխատակիցներին: Ներկայումս իրականացվում է նաև սոցիալական գնահատում, որը ևս իր հերթին պետք է նպաստի երեխայի անցնցում տեղափոխումը հատուկ դպրոցից հանրակրթական դպրոցներ: Բացի այդ, ստեղծվելու են իրազեկման խմբեր, որոնք պարբերաբար հանդիպումներ են ունենալու երեխաների, ծնողների և ուսուցիչների հետ, ինչպես նաև տեղի են ունենալու վերապատրաստումներ, որոնք ներառելու են ոչ միայն հատուկ մանկավարժներին, այլ նաև առարկայական ուսուցիչներին: Աշխատանքային խումբն իր առաջարկները կներկայացնի համընդհանուր ներառական կրթությանն անցման ծրագրերի համակարգման նպատակով ստեղծված միջգերատեսչական աշխատանքային խմբին, որի կազմում են ՀՀ կրթության և գիտության, աշխատանքի և սոցիալական հարցերի նախարարության, առողջապահության և տարածքային կառավարման և զարգացման նախարարությունների ներկայացուցիչները:

Նյութի աղբյուրը. ՀՀ կրթության և գիտության նախարարություն