Նոր մասնագիտություն, նոր չափորոշիչներ, կանոնադրության փոփոխություն. քննարկումներ ՄԿՈՒԶԱԽ-ի նիստում

Մայիսի 8, 2019

Պաշտոնական

ՀՀ կրթության և գիտության նախարարությունում տեղի է ունեցել Մասնագիտական կրթության և ուսուցման զարգացման ազգային խորհրդի /ՄԿՈՒԶԱԽ/  նիստը, որը վարել է խորհրդի նախագահ, ԿԳ նախարար Արայիկ Հարությունյանը: Խորհրդի կազմում ընդգրկված են ԿԳ նախարարի տեղակալ Գրիշա Թամրազյանը, սոցիալական գործընկերության կառույցները` գործատուներին ներկայացնող կազմակերպությունների, արհեստակցական միությունների, ՀՀ աշխատանքի և սոցիալական հարցերի, տնտեսական զարգացման և ներդրումների, տարածքային կառավարման, ֆինանսների նախարարությունների ներկայացուցիչներ: Մինչ օրակարգի հիմնական հարցերին անցնելը` ԿԳՆ նախնական /արհեստագործական/ և միջին մասնագիտական կրթության վարչության պետ Ա. Աղբալյանը ներկայացրել է ՄԿՈՒԶԱԽ-ի նոր կազմը, որը հաստատվել է ՀՀ վարչապետի կողմից` պայմանավորված խորհրդի նախկին անդամների պաշտոնների փոփոխությամբ: Նիստին հրավիրված էին նաև Եվրպական կրթական հիմնադրամի ներկայացուցիչներ Դիդյե Ժիլբերը և Մարի Դողլեն, ՀՀ-ում  ԵՄ պատվիրակության ներկայացուցիչ Դավիթ Ավագյանը:

Խորհուրդը քննարկել և հավանություն է տվել օրակարգում ընդգրկված 13 հարցերից 9-ին: Մնացած հարցերը ԿԳ նախարար Արայիկ Հարությունյանի  առաջարկությամբ որոշվել է քննարկել հաջորդ նիստում, որը տեղի կունենա առաջիկայում:

Խորհուրդը քննարկել է  ՄԿՈՒԶԱԽ-ի կանոնադրության փոփոխության հարցը, որն առաջարկել է Գործատուների հանրապետական միությունը: Գործատուների հանրապետական միության նախագահ Գագիկ Մակարյանն առաջարկներ է ներկայացրել խորհրդի անդամներին համարժեք փոխարինողներ ունենալու, խորհրդի աշխատանքների թափանցիկությունը բարձրացնելու, կառավարման ձևաչափը փոխելու վերաբերյալ՝ համոզմունք հայտնելով, որ կանոնադրական նշված փոփոխությունները կբարձրացնեն խորհրդի աշխատանքի արդյունավետությունը: Ընդգծելով, որ ԿԳ նախարարությունը շահագրգիռ է խորհրդի աշխատանքի արդյունավետությունը բարձրացնելու հարցում, նախարար Արայիկ Հարությունյանը Գագիկ Մակարյանին առաջարկել է բոլոր առաջարկները ներկայացնել գրավոր` կանոնադրության նոր տարբերակը առաջիկա նիստում քննարկելու համար: 

 Մասնագիտական կրթության և ուսուցման ազգային կենտրոնի տնօրեն /ՄԿՈՒԶԱԿ/ Տաթևիկ Գասպարյանը ներկայացրել է 2018 թվականի կատարած աշխատանքների հաշվետվությունը: Նշվել է, որ անցյալ տարի մշակվել, լրամշակվել և հաստատվել է 24 մասնագիտության չափորոշիչ, որոնք կներդրվեն քոլեջներում և ուսումնարաններում: Կատարվել է ավելի քան 470 մասնագետի վերապատրաստում, այդ թվում նաև 2017 թվականից ներդրված «Ձեռնարկատիրություն» մոդուլը դասավանդողների համար: Բացի այդ, կազմակերպվել է  «Հայասատանի հմտություններ» ազգային մրցույթը, որի հաղթողները մասնակցելու են այս տարի ՌԴ Կազան քաղաքում կայանալիք «Աշխարհի հմտություններ» միջազգային մրցույթին: Հայաստանի թիմը ներկայանալու է 3 մասնագիտությամբ:

Խորհուրդը հավանություն է տվել 2019 թվականին մշակման և վերանայման ենթակա երկու տասնյակ չափորոշիչների ցանկին, որում ներառված է նաև ՀՀ տնտեսական գերակայություններից բխող նոր մասնագիտություն` արևային և այլընտրանքային էլեկտրակայանների և սարքերի նորոգման և սպասարկման ոլորտի:

ԿԳՆ նախնական /արհեստագործական/ և միջին մասնագիտական կրթության վարչության պետ Ա. Աղբալյանը ներկայացրել է ՄԿՈՒ ոլորտում դոնոր կազմակերպությունների հետ ԿԳՆ  համագործակցության արդյունքները` նշելով, որ ԵՄ բյուջետային աջակցության ծրագրի շրջանակում ներդրումային խոշոր նախագծեր են նախատեսվում 8 գյուղատնտեսական քոլեջներում,  Գերմանական միջազգային համագործակցության ընկերության (GIZ) աջակցությամբ  մի շարք քոլեջներում փորձարկվում է աշխատանքի վրա հիմնված դուալ կրթության համակարգը: Բարերար Անուշավան Աբրահամյանի անվան հիմնադրամը շարունակական աջակցություն է ցուցաբերել իր ցանցում ընդգրկված մեկ տասնյակ քոլեջների և ուսումնարանների, իսկ առաջիկայում հիմնադրամի ֆինանսավորմամբ Արցախի Բերձորում կբացվի նոր արհեստագործական ուսումնարան: Նշվել է նաև, որ ֆրանսիահայ բարերար Եզնիկ Մոզյանի միջոցներով Շուշիում բացված «Եզնիկ Մոզյան» արհեստագործական ուսումնարանում  սովողող Հայաստանի Հանրապետության 20 ուսանողների թիվն այս տարի կավելանա ևս 10-ով: Ընդգծվել է, որ տվյալ ուսումնարանը տեխնիկապես լիարժեք հագեցած է և ապահովում է որակյալ մասնագիտական հմտությունների ձևավորման համար ժամանակակից պայմաններ:

Ամփոփելով խորհրդակցությունը` ԿԳ նախարար Արայիկ Հարությունյանը նշել է, որ արհեստագործական և միջին մասնագիտական կրթության ոլորտը պետության համար կարևոր նշանակություն ունի. առաջնային են, մասնավորապես, գործատուների հետ համագործակցությունը և աշխատաշուկայի նպատակային վերլուծությունը, որը պետք է հաշվի առնվի նաև պետական պատվերի ձևավորման և ընդունելության տեղերի բաշխման գործընթացում: 

Նյութի աղբյուրը. ՀՀ կրթության և գիտության նախարարություն