ԱրՄաթ ծրագիրը դպրոցում

Նոյեմբերի 19, 2019

Դպրոցական անցուդարձ

Նոյեմբերի 18-ին Կապանի N13 հիմնական դպրոցում պաշտոնապես բացվեց «Արմաթ» ինժեներական լաբորատորիան /Խմբավար Տիգրան Ավանեսյան/, որի տեղադրումն ու կահավորումը սկսվել էր մոտ երկու ամիս առաջ․ դրանց հիմնումը կյանքի է կոչվել «Իմ քայլը հանուն Սյունիքի մարզի» բիզնես համաժողովի ընթացքում «Առաջատար տեխնոլոգիաների ձեռնարկությունների միության» (գործադիր տնօրեն` Կարեն Վարդանյան) եւ «Դավիթ Բեկ» (նախագահ` Գագիկ Մելքումյան) հայրենակցական միության միջեւ կնքված հուշագրի շրջանակներում։ Բացման արարողության ժամանակ Սյունիքի մարզպետ Հունան Պողոսյանը, կրթօջախի համար կարևորելով այս նախաձեռնությունը, շնորհավորեց դպրոցի աշակերտներին ու մանկավարժներին և շնորհակալություն հայտնեց համագործակցած երկու կազմակերպություններին՝ ծրագրի իրականացման համար։ Դպրոցի մանկավարժական կոլեկտիվի և աշակերտության անունից կրթօջախի տնօրեն Զավեն Ստեփանյանը երախտագիտություն հայտնեց Առաջատար տեխնոլոգիաների ձեռնարկությունների միությանը, «Դավիթ բեկ» հայրենակցական կազմակերպությանը, Սյունիքի մարզպետարանի աշխատակազմին` Սյունիքի մարզպետ Հունան Պողոսյանի գլխավորությամբ` դպրոցում ինժեներական լաբորատորիայի հիմնումն իրականություն դարձնելու համար։ Նա համոզմունք հայտնեց, որ ինժեներական լաբորատորիայում ստացած հմտություններն ու ունակությունները կօգնեն մեր երկրի զարգացման գործում։ Կրթօջախի աշակերտական խորհրդի նախագահ Լիլիթ Մկրտչյանն իր խոսքում գոհունակություն հայտնեց այն առթիվ, որ ինքն ու իր հասակակիցները վաղ տարիքից հնարավորություն են ստանում ծանոթանալու ռոբոտաշինության ծրագրավորման հիմունքներին և գործնական հմտություններ ձեռք բերում։ Խմբակ հաճախող երեխաների քանակը կանոնավոր կերպով ավելանում է: Երեխաները հաճույքով են սովորում ծրագրավորման, ռոբոտաշինության հիմունքները, իսկ եռաչափ տպիչն ստանալուց հետո՝ հաճույքով մոդելավորում և տպում են կենցաղում կիրառելի առարկաներ: Կարծում եմ՝ խմբակ հաճախողների 60%-ը կընտրի ինժեների մասնագիտությունը: Նրանց հնարավորություն կտրվի մշակելու, կառուցելու, փորձարկելու և բարելավելու իրենց իսկ ստեղծած լուծումներն անվտանգ և ուրախ միջավայրում՝ ընթացքում ձեռք բերելով նոր ընկերներ և միասին հիմնելով ստարտափներ։

ՄԿԱ գծով փոխտնօրեն Ժաննա Վարդանյան