Սեպտեմբերի 1-ը Գավառի ավագ դպրոցում

Սեպտեմբերի 5, 2016

Դպրոցական անցուդարձ

Գունեղ և հուզիչ էր սեպտեմբերմեկյան այս առավոտը Գավառի ավագ դպրոցում ՝ ողջույնի խոսքեր, նորեկ տասներորդցիների ջերմ ընդունելություն: Հոսքերի բաժանելուց հետո աշակերտները ստացան դասղեկներից համապատասխան լոգոներ, ցանկություններով բացիկներ, որոնք կապեցին եռագույն փուչիկներին և բաց թողեցին երկինք իրականացման ակնկալիքով : 12-րդ դասարանցիներն էլ 10-րդցիներին փոխանցեցին գիտության ջահը՝ մաղթելով ջանասեր աշխատանք և խոր գիտելիքների ձեռքբերում: Հետո սկսվեց ամենահուզիչը. դպրոցի բակում ուսուցիչների, աշակերտների և ծնողներրի ներկայությամբ կատարվեց տնօրենների յուրատեսակ սերնդափոխություն: Բեմահարթակ հրավիրվեց մեր դպրոցի հիմա արդեն պատվավոր տնօրեն, բազմավաստակ մանկավարժ, ով իր բեղմնավոր աշխատանքի համար արժանացել է ԿԳ նախարարության «Լավագույն տնօրեն» ոսկե մեդալին, Մ.Խորենացու անվան շքանշանին, բազում պատվոգրերի և շնորհակալագրերի: Իսկ ամենագնահատելին այն է, որ Տ.Չիչակյանը ունի շրջանավարտների մի հոծ բանակ, որոնք դպրոցից տարել են ոչ միայն իրենց սիրելի ուսուցչի տված գիտելիքները, այլ նաև նրա մեծ հոգու սրտի լուսավոր մասնիկներից երբեք չմոռանալով նրա ուսուցանած կյանքի դասերը: Տիկին Չիչակյանը ողջունեց ներկաներին, հակիրճ ներկայացրեց դպրոցի անցած ուղին իր տնօրեն եղած 20 տարինեի ընթացքում:

Այնուհետև նա բեմ հրավիրեց նորանշանակ տնօրեն տ. Ն.Ղուլոյանին, ներկայացրեց նրան՝ իր իսկ շրջանավարտին, որպես երիտասարդ խոստումնալից ղեկավարի, մաղթեց արգասաբեր աշխատանքով ամուր պահել դպրոցը, շարունակելով լավագույն ավանդույթները նոր մոտեցումներով ավելի բարձրացնել ավագ դպրոցի հեղինակությունը: 
Ն.Ղուլոյանը մեծ երախտիքի խոսքերով դիմեց Տ.Չիչակյանին՝ իր առաջին ուսուցչին, հետո կոլեգային, տնօրենին, մի խոսքով՝ կյանքի ուսուցչին: Նոր տնօրենն ասաց, որ կփորձի անել ամեն ինչ իր ստանձնած լրջագույն գործը լավագույնս կատարելու համար: Դպրոցի աշակերտական գործուն խորհրդի նախագահ Ժ.Ղափանցյանն էլ իր խոսքում բոլոր աշակերտների անունից շնորհակալություն հայտնեց տ. Չիչակյանին հոգատարության, խստապահանջ բարության համար և շնորհավորեց տ. Ղուլոյանին նոր պաշտոնի կապակցությամբ: Վերջում նա բոլոր ներկաներին հրավիրեց ֆլեշմոբի: Գեղեցիկ ստացվեց:

    Գավառի ավագ դպրոցի ՄԿԱ գծով տնօրեն Ա.Բաբասյան