Վահրամ Դումանյանը հանդիպել է ԱՊՀ խաղերում Հայաստանի մարզական պատվիրակության հետ

Օգոստոսի 30, 2021

Սպորտային լուրեր

Սեպտեմբերի 2-ին Կազանում մեկնարկելու են ԱՊՀ երկրների առաջին խաղերը, որտեղ Հայաստանը ներկայացնելու է 11 մարզաձևից 55 մարզիկ:

ՀՀ կրթության, գիտության, մշակույթի և սպորտի նախարար Վահրամ Դումանյանը և նախարարի տեղակալ Կարեն Գիլոյանն այսօր հանդիպել են ԱՊՀ խաղերում Հայաստանի մարզական պատվիրակության հետ: Ողջունելով մարզաշխարհի ներկայացուցիչներին՝ ԿԳՄՍ նախարարն ասել է, որ նրանցից ակնկալիքները մեծ են. «Բոլորիդ հաջողություն և հաղթանակներ եմ մաղթում: Փորձե՛ք ձեր մրցելույթներով դրական լիցքեր փոխանցել մեր ժողովրդին. մենք դրա կարիքը շատ ունենք: Մարզաշխարհում հաջողությունները, դրական լիցքերից բացի, հաղորդում են ուժ և վստահություն, որ մենք հզոր ենք ու կարող ենք առաջ շարժվել: Իհարկե, ունենք հաղթական ակնկալիքներ, բայց կարևոր է նաև պարզապես լավ մասնակցությունը»:

ԿԳՄՍ նախարարի տեղակալ Կարեն Գիլոյանն ընդգծել է, որ Կազան է մեկնելու բավականին ուժեղ պատվիրակություն, ուստի մեդալային ակնկալիքներն արդարացված են. «Անկեղծ լինենք, կան մարզաձևեր, որոնցից մեդալային ակնկալիքները մեծ չեն, բայց և կան մարզաձևեր, որոնցում պարտավոր ենք մեդալ նվաճել: Նախապատրաստական աշխատանքներն ընթացել են հավուր պատշաճի, խնդիրները լուծված են: Ձեզ մնում է լավ մասնակցել և հիշել՝ հաղթանակների կարիքն իսկապես կա»:

Պատվիրակության անդամները նշել են՝ ջանք չեն խնայի Հայաստանի մարզական պատիվը բարձր պահելու և հայկական դրոշն ի պատիվ հաղթանակի ծածանելու համար:

ԿԳՄՍ նախարար Վահրամ Դումանյանը վստահեցրել է, որ հաղթանակներն աննկատ չեն մնա. «Մրցանակակիրները կգնահատվեն ըստ արժանվույն: Ձեր հաջողություններն աննկատ չեն մնացել և չեն մնա: Վստա՛հ եղեք, որ ցանկացած հաղթանակ արժանանում է հնարավոր առավելագույն գնահատականին»:

Հանդիպման ընթացքում ԿԳՄՍ նախարարը նաև պատասխանել է մարզաշխարհի ներկայացուցիչների հարցերին՝ ընդգծելով, որ հնչած բոլոր առաջարկություններն ու նկատառումները հաշվի կառնվեն և կքննարկվեն պրոֆեսիոնալ շրջանակում:

Հավելենք, որ Հայաստանի մարզական պատվիրակությունից Կազան առաջինը մեկնելու են բռնցքամարտիկները, որոնց մրցումները սկսվելու են սեպտեմբերի 2-ին: Խաղերի բացման պաշտոնական արարողությունը նախատեսված է սեպտեմբերի 4-ին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն