Կայացավ «Հայաստանի Հանրապետության վարչապետի գավաթ» կրոսավազքի սիրողական մրցաշարը

Նոյեմբերի 1, 2021

Սպորտային լուրեր

Հոկտեմբերի 30-ին Երևան-Էջմիածին ճանապարհին կայացել է «Հայաստանի Հանրապետության վարչապետի գավաթ» կրոսավազքի սիրողական մրցաշարը:

Մրցմանը մասնակցել է 3 տարիքային խմբի ավելի քան 1500 մասնակից։ 3 կմ մրցատարածությունը հաղթահարել են 15-17 տարեկան դպրոցական աղջիկներն ու տղաները, իսկ 18-35 տարեկան կանայք, 18-40 տարեկան տղամարդիկ, ինչպես նաև 36 և բարձր տարիքի կանայք, 41 և բարձր տարիքի տղամարդիկ վազել են 10 կմ։

18-40 տարեկան տղաների պայքարում 10 կմ տարածությունը բոլորից շուտ հաղթահարել է Հայաստանի աթլետիկայի հավաքականի անդամ, վազորդ Երվանդ Մկրտչյանը, ով 10 կմ-ը վազել է մոտ 30 րոպեում և արժանացել1 մլն դրամ մրցանակին։

«Սա հիանալի հնարավորություն էր թե՛ ինքդ քեզ, թե՛ մյուս մարզիկներին ցույց տալու, որ կարող ես հաղթահարել քո առջև դրված խնդիրը: Շատ լավ հաղթահարեցի 10 կմ-ը»,- ասել է գյումրեցի Երվանդ Մկրտչյանն ու նշել, որ Գյումրիում իր համար ավելի դժվար է վազելը, քանի որ ծովի մակարդակից բարձր է, ճանապարհն էլ՝ ոչ այնքան հարթ։

«Չի կարելի ասել, թե հավասարը չունեի: Այստեղ շատերին ճանաչում եմ, բոլորն իմ ընկերներն են ու բոլորն էլ շատ լավ վազեցին: 10 կմ վազելու փորձ չունեի, 5 անգամ մասնակցել եմ Երևանի կիսամարաթոնին ու 5 անգամ էլ չեմպիոն դարձել։ Նման մրցաշարերը շատ եմ կարևորում. սա ևս կնպաստի աթլետիկայի զարգացմանը մեր երկրում, քանի որ աթլետիկան սպորտի թագուհին է»,- նշել է Երվանդ Մկրտչյանը։

Այս տարիքային խմբում երկրորդ տեղը զբաղեցրել է Բալաբեկ Հարությունյանը, իսկ պատվո հարթակի երրորդ աստիճանին կանգնել է Մհեր Մաշումյանը։ Այս տարիքային խմբի մրցանակակիրներին պարգևատրել է ՀՀ վարչապետ Նիկոլ Փաշինյանը։

«Շնորհավորում եմ բոլոր մրցանակակիրներին, ինչպես նաև՝ մեզ բոլորիս։ Այս ընթացքում ես անընդհատ հետաքրքրվում էի, թե քանի մարդ է հայտ ներկայացրել մասնակցության համար, և այդ թիվն ինձ անհրաժեշտ էր ոչ թե վիճակագրության համար, այլ որպեսզի հասկանայի՝ արդյոք այս նախաձեռնությունն անհրաժե՞շտ է մարդկանց, ՀՀ քաղաքացիներին։ Այն փաստը, որ այսօր ավելի քան 1500 մասնակից ենք ունեցել, տալիս է այդ հարցի պատասխանը՝ այո՛, անհրաժեշտ է։

Ուզում ենք, որ մեր հայրենակիցներն իրենց առջև խնդիրներ դնեն ու լուծեն դրանք, կյանքում էլ առաջնորդվեն այդ գաղափարով՝ ունենալ նպատակասլացություն և վճռականություն, կանգնել մեկնարկին, անցնել տարածությունն ու հատել վերջնակետը»,- ընդգծել է ՀՀ վարչապետը։

Պարգևատրման արարողությանը մասնակցել են նաև ՀՀ ԿԳՄՍ նախարար Վահրամ Դումանյանը, ԿԳՄՍ նախարարի տեղակալ Կարեն Գիլոյանը, Էջմիածնի քաղաքապետ Դիանա Գասպարյանը և պաշտոնատար այլ անձինք։

Կարեն Գիլոյանը ևս շնորհավորել է բոլոր մրցանակակիրներին և հույս հայտնել, որ աստիճանաբար նշաձողն ավելի ու ավելի կբարձրացվի․ «Մրցաշարը կամփոփեմ ընդամենը մեկ բառով՝ կայացավ բոլոր առումներով՝ և՛ մասնակիցների քանակով, և՛ մասնակցության գեղեցկությամբ, մասսայականությամբ, և՛ կազմակերպչական բոլոր խնդիրների լուծմամբ, և՛ մրցանակային հիմնադրամով։ Այսօր մենք ևս մեկ քայլ կատարեցինք դեպի մասսայական սպորտ։ Մենք ևս մեկ անգամ ապացուցեցինք, որ կարող ենք և պարտավոր ենք առողջ ապրել»։

Կարեն Գիլոյանը խոստովանել է, որ մտավախություն ուներ՝ 10 հազար մետր մրցատարածքը բարդ կլինի, ու շատ մասնակից չենք ունենա, սակայն հիմա հաճելիորեն զարմացած է մասնակիցների մեծ թվից։

«Մրցանակակիրները լավ արդյունք ցույց տվեցին, շնորհավորում եմ բոլորին։ Այո՛, կային մարզված տղաներ՝ աթլետներ, բայց այն, որ 10 հազար մետրում պրոֆեսիոնալ չէին, դա փաստ է, քանի որ Հայաստանում 10 հազար մետր մրցատարածքի պրոֆեսիոնալ մարզիկ չկա։ Եվ մենք դրանով բացառել ենք պրոֆեսիոնալների մասնակցությունը։ Այնպես որ, սա իսկապես շատ մեծ մրցատարածք էր, ու մասնակիցներից յուրաքանչյուրը փոքրիկ սխրանք գործեց։ Մասնակիցներից յուրաքանչյուրը հաղթանակ տարավ ինքն իր նկատմամբ։ Ինչքան նշաձողը բարձրացնենք, այնքան ավելի լավ կլինի, մասսայական կդառնա, արդյունքներն էլ կբարելավվեն»,- եզրափակել է ԿԳՄՍ նախարարի տեղակալը։

Կրոսավազքի սիրողական մրցաշարին մասնակցել է նաև ՀՀ-ում Ուկրաինայի դեսպանատան առաջին քարտուղար Վիկտոր Օլեյնիկը, որին խրախուսական մրցանակ է հանձնվել։ Խրախուսական մրցանակներ են հանձնվել նաև մրցաշարի ամենատարեց մասնակիցներին՝ 79-ամյա Խաչատուր Փրխոյանին ու 73-ամյա Շուշանիկ Պողոսյանին։

18-35 տարեկան կանանց պայքարում հաղթողի կոչումը նվաճել է Էլլադա Ալավերդյանը, երկրորդը վանաձորցի Լիլիթ Հարությունյանն էր, իսկ երրորդ տեղը գրավել է Ալեքսանդրա Գալինսկին Ստեփանակերտից։

Առաջին տարիքային խմբի` 15-17 տարեկան դպրոցականների մրցանակակիր տղաները և աղջիկները ստացել են համակարգիչներ: Երկրորդ և երրորդ տարիքային խմբերում առաջին տեղի համար սահմանված էր 1 մլն դրամ մրցանակ, երկրորդ տեղի համար` 600 հազար դրամ, երրորդ տեղի համար` 400 հազար դրամ, չորրորդ տեղի համար` 150 հազար դրամ, հինգերորդ տեղի համար՝ 100 հազար դրամ: Դրամական խրախուսումներ էին նախատեսված նաև 6-10-րդ տեղեր գրավածների համար` 75-հազարական դրամ, իսկ 11-20-րդ տեղերի համար` 50-հազարական դրամ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն