Բռնցքամարտի ԱԱ․ Դավիթ Չալոյանն ու Հովհաննես Բաչկովն առնվազն բրոնզե մեդալ են ապահովել

Նոյեմբերի 3, 2021

Սպորտային լուրեր

Սերբիայում ընթացող բռնցքամարտի աշխարհի առաջնությունում Հայաստաննապահովել է առաջին մեդալները:

Գերծանր քաշային Դավիթ Չալոյանը քառորդ եզրափակչում կամային հաղթանակ է տարել Ուզբեկստանի ներկայացուցիչ Լալիզբեկ Մոլուջանովի նկատմամբ և դուրս եկել կիսաեզրափակիչ՝ ապահովելով առնվազն բրոնզե մեդալ։

Գերծանր քաշային կարգում Հայաստանն առաջին անգամ է մրցանակակիր ունենալու աշխարհի առաջնությունում։
Չալոյանը կիսաեզրափակչի մենամարտը կանցկացնի նոյեմբերի 4-ին։

Հայաստանի մյուս ներկայացուցիչ, Տոկիոյի Օլիմպիական խաղերի բրոնզե մեդալակիր Հովհաննես Բաչկովը (63,5) քառորդ եզրափակչում մենամարտել է Թաիլանդի ներկայացուցիչ Սոմչայ Վոնգսուվանի հետ և մրցավարների որոշմամբ պարտվել՝ 2։3։ Սակայն, Հայաստանի բռնցքամարտի ֆեդերացիայի բողոքարկումից հետո հաղթանակը շնորհվել է հայ բռնցքամարտիկին:

Բաչկովը ռինգում երկրորդ անգամ էր հանդիպում Վոնգսուվանին: 2019 թվականի աշխարհի առաջնության 1/16-րդ եզրափակչում Բաչկովը 4:1 հաշվով հաղթել էր Թաիլանդի ներկայացուցչին:

Գյումրեցի բռնցքամարտիկն աշխարհի առաջնությունում պայքարը սկսել էր 1/16 եզրափակչից, որտեղ տպավորիչ հաղթանակ էր տարել Ադրբեջանի ներկայացուցիչ Մալիկ Հասանովի նկատմամբ, իսկ 1/8 եզրափակչում Բաչկովը մրցել էր Իտալիայի ներկայացուցիչ Ջիանլուիջի Մալանգայի հետ և 3-2 հաշվով հաղթանակ տոնել:

Այսպիսով, աշխարհի առաջնության կիսաեզրափակչում Հայաստանը կունենա երկու ներկայացուցիչ:

Հիշեցնենք՝ բռնցքամարտի աշխարհի առաջնությանը Հայաստանը ներկայացված էր 11 մարզիկով։

ԱԻԲԱ-ի 75-ամյա պատմության մեջ առաջին անգամ բռնցքամարտի աշխարհի առաջնության մրցանակակիրները կպարգևատրվեն. ընդհանուր առմամբ սահմանվել է 2,6 միլիոն դոլար մրցանակային ֆոնդ։ ԱԱ-ի ոսկե մեդալակիրները կստանան 100, արծաթե մեդալակիրները` 50, իսկ բրոնզե մեդալակիրները` 25 հազարական ԱՄՆ դոլար:

Նյութի աղբյուրը. ՀՀ կրթության, գիտության, մշակույթի և սպորտի նախարարություն