Հանրապետական ուսանողական 22-րդ մարզական խաղեր. կայացել են ֆուտզալի մրցումները

Նոյեմբերի 18, 2021

Սպորտային լուրեր

«Դինամո» մարզահամալիրում անցկացվել է Հանրապետական ուսանողական 22-րդ մարզական խաղերի ծրագրով ֆուտզալի մրցաշարը, որին մասնակցել են 14 բարձրագույն հաստատությունների թիմեր՝ շուրջ 168 ուսանող մարզիկներով: Խաղերն անցկացվել են 4 փնջերով:

Մարզական խաղերի փակմանը ներկա են գտնվել ՀՀ կրթության, գիտության, մշակույթի և սպորտի նախարարության սպորտի քաղաքականության վարչության պետ Նարինե Շահբազյանը և Հայաստանի ֆիզիկական կուլտուրայի և սպորտի պետական ինստիտուտի ռեկտոր Դավիթ Խիթարյանը:

Հանրապետական ուսանողական 22-րդ մարզական խաղերի ծրագրով ֆուտզալի մրցումների հաղթողի տիտղոսը նվաճել է Հայաստանի պետական տնտեսագիտական համալսարանի թիմը, որը եզրափակչում 5-2 հաշվով առավելության է հասել Հայաստանի ֆիզիկական կուլտուրայի և սպորտի պետական ինստիտուտի թիմի նկատմամբ:

ՀՖԿՍՊԻ-ի թիմն արժանացել է արծաթե մեդալներին, իսկ լավագույն եռյակը եզրափակել է Ճարտարապետության և շինարարության Հայաստանի ազգային համալսարանի թիմը՝ մրցանակային երրորդ տեղի համար անցկացված խաղում 5-0 հաշվով հաղթելով Հայաստանի ամերիկյան համալսարանի թիմին:

Մարզական խաղերի ծրագրով ֆուտզալի մրցումներին մրցանակային 1-ին, 2-րդ և 3-րդ տեղեր գրաված թիմերը պարգևատրվել են ՀՀ կրթության, գիտության, մշակույթի և սպորտի նախարարի համապատասխան կարգի հավաստագրերով, մեդալներով, գավաթներով և դրամական պարգևներով՝ մարզագույք ձեռք բերելու համար:

Մրցումներին մասնակցել են նաև Երևանի պետական համալսարանի, Հայաստանի ազգային պոլիտեխնիկական համալսարանի, Հայ-ռուսական համալսարանի, Վանաձորի Հ. Թումանյանի անվան պետական համալսարանի, Գյումրու ՊՀՏՀ-ի, Պլեխանովի անվան տնտեսագիտական համալսարանի, Հայաստանի ազգային ագրարային համալսարանի, Հայաստանում ֆրանսիական համալսարանի, Եվրոպական համալսարանի և Երևանի Վ. Բրյուսովի անվան պետական համալսարանի թիմերը:

Նյութի աղբյուրը. ՀՀ կրթության, գիտության, մշակույթի և սպորտի նախարարություն