ՀԱՅԿԱԿԱՆ ԿՐԹԱԿԱՆ ՄԻՋԱՎԱՅՐ
ՊՈՐՏԱԼ
ԿՐԹԱԿԱՆ
ՖՈՐՈՒՄ
ՊԱՇԱՐՆԵՐԻ
ՇՏԵՄԱՐԱՆ
ՀԵՌԱՎԱՐ
ՈՒՍՈՒՑՈՒՄ
ԻՆՏԵՐԱԿՏԻՎ
ՈՒՍՈՒՑՈՒՄ
ԿԿՏ
ՀԱՄԱԿԱՐԳ

Տեղի է ունեցել «Պատմություն #5» ռեսուրսատուփի շնորհանդեսը

Հունվարի 25, 2022

Կրթության միջազգային օրը՝ հունվարի 24-ին, Հայաստանի ամերիկյան համալսարանում տեղի է ունեցել «Պատմություն #5. բացակա՝ պատմության դասից, ներկա՝ անցյալում» ռեսուրսատուփի շնորհանդեսը:

Միջոցառմանը մասնակցել են ՀՀ կրթության, գիտության, մշակույթի և սպորտի նախարարության, ՄԱԿ-ի Մանկական հիմնադրամի հայաստանյան գրասենյակի, «Պարադիգմա» կրթական հիմնադրամի ներկայացուցիչներ, հյուրեր: Միջոցառմանն առցանց միանալու հնարավորություն են ունեցել հանրապետության մի շարք ուսուցիչներ:

ԿԳՄՍ նախարարի տեղակալ Ժաննա Անդրեասյանը, շնորհավորելով կրթության միջազգային օրվա կապակցությամբ, նշել է, որ պետք է համատեղ ջանքերով բարելավել և էապես բարձրացնել կրթության որակը: Նրա խոսքով՝ վերջին շրջանի իրողությունները և համավարակը նոր սրությամբ են դրել յուրաքանչյուր երեխայի կրթության իրավունքի հարցը, որը պետք է իրացվի որակյալ կրթության հասանելիությամբ:

«Որակյալ կրթության հասանելիության խնդիրներից մեկը կրթության պատշաճ ռեսուրսների առկայությունն է, և դրան է ուղղված այսօրվա նախաձեռնությունը՝ լրացնել ուսուցիչների գործիքակազմը, որը թույլ կտա էապես հեշտացնել պատմության ուսուցանման գործընթացը: Այս իմաստով այն առանցքային առարկա է, որովհետև պատմությունն առաջին հերթին գիտելիք է և կարողություն՝ վերլուծելու սեփական անցյալը, ներկան և պատկերացնելու ապագան: Հատկապես նոր չափորոշչի պարագայում մենք պատմության ուսուցանման գործիքակազմն էապես ընդլայնելու, այն առավել ճկուն դարձնելու, մեր կարիքներին համապատասխանեցնելու և ճանաչողության ու ինքնաճանաչողության իրական գործիք դարձնելու հնարավորություն ունենք»,- նշել է Ժաննա Անդրեասյանը:

Նրա խոսքով՝ «Պարադիգմա» կրթական հիմնադրամի մշակած պատմության ուսուցման ձեռնարկը, որը երաշխավորված է ԿԳՄՍՆ-ի կողմից, և ներկայացված հավելյալ ռեսուրսը հնարավորություն են տալիս չափորոշչով դրված խնդիրը մեկ քայլ առաջ տանելու:

«Կարևորում եմ ընտրված մեթոդը. այն մշակվել է նախագծային ուսուցման հիմքի վրա, որը նոր չափորոշչով համարվում է դպրոցի պարտադիր բաղադրիչ: Կարևորում եմ նաև ընտրված թեմաները՝ իբրև նյութի ներկայացման առանցք, և սա նույնպես նոր չափորոշչի շեշտադրումներից է: Խոսքը գենդերային հավասարության, տղամարդկանց և կանանց ներկայացվածության համաչափության մասին է: Ուրախ եմ, որ ներկայացված նյութերը հնարավորություն են տալիս անդրադառնալու մեր հասարակության համար խիստ զգայուն, սակայն շատ կարևոր թեմայի: Հուսով եմ, որ կգտնենք ճիշտ մեթոդաբանությունն ու ձևը՝ մեր երեխաներին առերեսելու մեր պատմությանը»,- նշել է Ժաննա Անդրեասյանը՝ ընդգծելով, որ ԿԳՄՍ նախարարությունը պատրաստակամ է աջակցելու բոլոր կարևոր նախաձեռնություններին:

ՄԱԿ-ի Մանկական հիմնադրամի Հայաստանի ներկայացուցիչ Քրիսթին Վայգանդն իր հերթին նշել է, որ համաձայն Համաշխարհային բանկի կողմից 2016 թվականին իրականացված հետազոտության՝ ‹‹Հայոց պատմության›› դասագրքերում նյութերի 80 տոկոսը տղամարդկանց մասին է: Նա կարևորել է, որ կանայք ևս ներգրավված լինեն այդ նյութերում, որպեսզի վաղ տարիքից երեխաները տեղեկացված լինեն կանանց և տղամարդկանց հավասար իրավունքների մասին: Քրիսթին Վայգանդը հույս է հայտնել, որ ներկայացված ռեսուրսային փաթեթը, որտեղ ներառված են էթնիկական, պատմական, ժողովրդագրական նյութեր, կօգնի ուսուցիչներին՝ լրացնելու ուսուցման մեթոդաբանությունը:

«Պարադիգմա» կրթական հիմնադրամի ներկայացուցիչները ներկայացրել են և փորձարկել գործիքը՝ նշելով, որ «Պատմություն #5» ռեսուրսատուփը պատմության ուսուցման նորարար միջոց է ոչ միայն Հայաստանում, այլև շատ զարգացած երկրներում:

Ռեսուրսատուփը պարունակում է հինգ թեմայի վերաբերյալ 240 աղբյուրային քարտ, հինգ էլեկտրոնային դասապլան, որոնք թույլ կտան խաղային ուսուցման որոշ սկզբունքների կիրառմամբ վերլուծել հայոց պատմության մի շարք դրվագներ։ «Պատմություն #5»-ի 1000 օրինակ կնվիրաբերվի ՀՀ պետական հանրակրթական դպրոցներին։

«Պատմություն #5» ռեսուրսատուփը հայոց պատմության մի շարք թեմաներ դիտարկում է կանանց և տղամարդկանց առօրյայի, դերերի, դրանք սահմանող քաղաքականության ու հարաբերությունների, սովորույթների ու ձգտումների տեսանկյունից։ Այն պարունակում է աղբյուրային տեղեկության պատրաստի քարտեր և դրանց կիրառման ուղեցույց՝ ակտիվ պատմական ուսումնառության համար։

«Պատմություն #5» ուսուցչի էլեկտրոնային ուղեցույցում զետեղված են հետևյալ հինգ թեմաները՝ «Կանանց ազատագրության հարցը խորհրդային վաղ շրջանում», «Ամուսինների նախահարսանեկան և ետհարսանեկան ծիսական վարքը՝ ավանդական ու արդի հայ հասարակություններում», «Հայ կանանց հասարակական գործունեությունը 19-րդ դարում և 20-րդ դարի սկզբին Օսմանյան և Ռուսական կայսրություններում ու Պարսկաստանում (Իրանում)», «19-րդ դարի Օսմանյան կայսրության հայկական վիլայեթների հայերի պանդխտությունը» և «Հայ կնոջ վերաբերյալ հանրային քննարկումները 19-րդ դարի վերջին և 20-րդ դարի սկզբին Օսմանյան ու Ռուսական կայսրություններում»։

Նյութի աղբյուրը. ՀՀ կրթության, գիտության, մշակույթի և սպորտի նախարարություն

  • Տեղեկատվություն «Պաշարների շտեմարան» կայքում տեղադրված ՏՀՏ գործիքների վերաբերյալ

    Թեմայի հեղինակ՝ arpi.kirishyan

    «Պաշարների շտեմարան» նոր կայքում, որի գործարկման մեկնարկը https://lib.armedu.am/ հասցեում տրվեց 2022 թվականին, տեղադրվել է արդեն 18 000-ից ավելի կրթական էլեկտրոնային պաշար: Կայքում բացվել է Կրթական տեխնոլոգիաներ բաժին, որտեղ տեղադրված են…

  • Ուսուցիչը՝ կրթության հենասյուն

    Թեմայի հեղինակ՝ manush

    Ուսուցչի օրվա առթիվ մի խումբ մանկավարժներ և ոլորտի ներկայացուցիչներ պարգևատրվել են ԿԳՄՍ նախարարի կողմից ՀՀ կրթության, գիտության, մշակույթի և սպորտի նախարարությունը Ուսուցչի միջազգային օրվա առթիվ պարգևատրել է ոլորտի մի խումբ…

  • Ինչո՞ւ է երեխան դպրոցից գնում կրկնուսույցի մոտ:

    Թեմայի հեղինակ՝ zhanna@ktak.am

    Ողջույն, հայգելի գործընկերներ: Օրեր առաջ սոցիալական մեդիահարթակներում մի փոքրիկ հարցում անցկացրեցինք պարզելու համար՝ հասարակությանը առավել հետաքրքրող թեմաները: Հարցումների արդյունքում ընտրվեց այսօրվա մեր քննարկվելիք թեման՝ ինչո՞ւ է երեխան դպրոցից գնում կրկնուսույցի…

  • Ջոն Դյուի՝ նախագծային մեթոդի հիմնադիր

    Թեմայի հեղինակ՝ LZH

    <<Կրթությունը պատմելը և պատմություններ լսելը չէ․ այն ակտիվ և կառուցողական գործընթաց է>> Ջոն Դյուի Նախագծերի մեթոդը (Project methods (http://education.stateuniversity.com/pages/2337/Project-Method.html)) ուսուցման համակարգ է, որի ընթացքում սովորողները գիտելիքներ, կարողություններ, հմտություններ են ձեռք…

  • 9-րդ դաս. Բնագիտություն առարկայի քննությունը ուս. նախագծի միջոցով անցկացնելու մասին

    Թեմայի հեղինակ՝ manush

    ՀՀ ԿԳՄՍ նախարարի մարտի 11-ի 2024 թվականի N 07-Լ հրամանով հաստատվել է Հայաստանի Հանրապետության Տավուշի մարզի հանրակրթական ուսումնական հաստատությունների 2023-2024 ուսումնական տարվա 9–րդ դասարանի «Բնագիտություն» («ֆիզիկա», «Քիմիա», «Կենսաբանություն», «Աշխարհագրություն»՝ սովորողի…