Անահիտ Միքայելյան. «Թանգարանները կարևոր կրթական միջավայր են և առաջարկում են ուսուցման զգալի ներուժ»

Փետրվարի 28, 2022

Մշակութային լուրեր

(Մաս 2)
Սերգեյ Փարաջանովի թանգարանի կրթական ծրագրերը

Թանգարանի տնօրեն Անահիտ Միքայելյանի դիտարկմամբ՝ սովորելը չի սահմանափակվում միայն դպրոցի դասասենյակով: Թանգարանները կարևոր կրթական միջավայր են և առաջարկում են ուսուցման զգալի ներուժ:

«Թանգարաններում ցուցադրված հավաքածուները հասարակությանը, մասնավորապես՝ աշակերտներին և ուսանողներին շոշափելի կապ են տալիս ժամանակի, վայրերի, իրադարձությունների կամ մարդկանց հետ և թույլ են տալիս նրանց զգալ մարդկության պատմության և մշակութային ժառանգության էվոլյուցիան: Այս հարթակում սովորելը օգնում է հասարակությանը հասկանալ առարկաների պատմական արժեքը, հարգել բազմազան մշակույթները և հասկանալ բազմամշակութայնությունը:

Թանգարանների ուսումնասիրությունը սովորողին հնարավորություն է տալիս ակտիվորեն ներգրավվելու գիտելիքների ձեռքբերման գործընթացում և արտահայտելու մտքեր և զգացմունքներ»,- նշել է Անահիտ Միքայելյանը և հավելել, որ թանգարանների արդյունավետ օգտագործումը կարող է հանգեցնել բազմակողմանի ուսուցման, հմտությունների ձեռքբերման և քննադատական մտածողության զարգացման:

Փարաջանովի թանգարանում շուրջ 10 տարի վարելով էքսկուրսիաներ՝ ներկայիս տնօրեն Անահիտ Միքայելյանը ոչ միայն տեղեկություններ է հաղորդել այցելուներին, այլև իրականացրել է մասնագիտական հետազոտություն, հատկապես՝ դպրոցահասակ երեխաների շրջանում:

«Փորձում էի հասկանալ տարբեր տարիքի երեխաների՝ Սերգեյ Փարաջանովի ստեղծագործությունների ընկալման առումով: Մատուցման ի՞նչ հմտություններ պետք է կիրառել, որտե՞ղ ենք թերանում՝ որպես էքսկուրսավար, ի՞նչն է խանգարում երեխաներին՝ մտնելու այդ աշխարհը, ի՞նչ օժանդակող միջոցներ և մեթոդներ պետք է կիրառվեն՝ ստեղծագործության մատուցման համար: Աշխատելով այս բոլոր հարցադրումների շուրջ՝ անցած տարվանից արդեն գործարկվում են երկու կրթական ծրագրեր, որոնք ադապտացվում են տարբեր տարիքի երեխաների համար:

«Իրերը՝ Փարաջանովի աչքերով» կրթական ծրագիրը՝ փոքրիկ այցելուների համար

Անահիտ Միքայելյանի ներկայացմամբ՝ այս ծրագրի ընթացքում փոքրիկ այցելուները հնարավորություն ունեն ծանոթանալու արվեստագետի զարմանահրաշ աշխարհին, որտեղ նա երկրորդ շունչ էր տալիս շատերի աչքում «անարժեք և անպիտան» իրերին: Ծրագիրը նախատեսված է 7-15 տարեկան երեխաների և դեռահասների համար: Յուրաքանչյուր խմբում ընդգրկվում են 5-10 մասնակից: Կոլաժների ստեղծման համար մասնակիցները կիրառում են բազմազան իրեր, որոնք բերում են իրենց հետ, իսկ թանգարանն ապահովում է համապատասխան նյութերով: Երեխաները մեծ ոգևորությամբ և սիրով են ստեղծում կոլաժներ՝ գեղագիտության միջոցով անպետք իրերին հաղորդելով երկրորդ կյանք: Արդյունքում նրանց կողմից ստեղծվում են փարաջանովյան կոլաժներ՝ տարբեր թեմաներով, ոճերով և մոտեցումներով:

Ծրագրի նպատակն է բացահայտել թանգարանի ցուցադրությունում ներկայացված ստեղծագործությունների կրթական և դաստիարակչական ներուժը, ներկայացնել արվեստագետի ստեղծագործական բազմազանությունը և մտային բազմակողմանիությունը, ինչը կնպաստի երեխաների ճանաչողական, վերարտադրող, ստեղծագործական ունակությունների խթանմանը։

«Պատառիկներ» կրթական ծրագիր

Ծրագիրը բաղկացած է վեց թեմատիկ խաղ-էքսկուրսիաներից, որոնք ծանոթացնում են երեխաներին Փարաջանովի տասներկու կոլաժներին։ «Դիմանկար», «Կախվածություններ», «Գեղագիտություն» և «Աշխարհագրություն» խաղ-էքսկուրսիաները նախատեսված են 7-15 տարեկան երեխաների, դեռահասների, ուսանողական լսարանի և ընտանեկան խմբերի համար: Յուրաքանչյուր խմբում ընդգրկվում են 5-12 մասնակից:

«Ծրագրի ընթացքում օգտագործվում են Փարաջանովի ստեղծագործությունների մշակված վերատպությունները և հավելյալ այլ ստեղծագործական նյութեր։ Էքսկուրսավար-վարողը, հենվելով բնագավառին վերաբերող գիտելիքների վրա, կառուցում է հարցերը: Օրինակ՝ ինչո՞ւ է կոչվում դիմանկար, ինչպե՞ս կնկարագրեք պատկերը կամ ինչպիսի՞ մարդ է, ի՞նչ կպատմեք պատկերի մասին, Ձեր կարծիքով՝ ո՞վ է եղել այս մարդը և այլն: Գտնելով այս և նմանատիպ հարցերի պատասխանները՝ երեխաները պատկերացում են կազմում գեղագիտության մասին: Երեխաները շատ են սիրում նաև «Կախվածություն» խաղ-էքսկուրսիան, որը հնարավորություն է ընձեռում նաև զուգահեռներ անցկացնելու թեկուզ այն հանգամանքի հետ, որ շատերը կախվածություն ունեն հեռախոսներից:

Ծրագրի նպատակն է բացահայտել թանգարանի ցուցադրությունում ներկայացված ստեղծագործությունների կրթական և դաստիարակչական ներուժը, ներկայացնել արվեստագետի ստեղծագործական բազմազանությունն ու գեղագիտական մոտեցումները»,- ասել է թանգարանի տնօրենը և հավելել, որ թանգարանը անցյալ տարվանից ձեռնամուխ է եղել նաև սոցիալական ծրագրերի ստեղծմանը, արդեն աշխատանքային թիմում ընդգրկվել է հոգեբան-մանկավարժը, և առաջիկայում թանգարանը հանդես կգա սոցիալական բազմաթիվ ծրագրերով:

Շարունակելի

Նյութի աղբյուրը. ՀՀ կրթության, գիտության, մշակույթի և սպորտի նախարարություն