Անահիտ Միքայելյան. «Միջազգային համագործակցության շրջանակում Փարաջանովի թանգարանը Ֆրանսիայում և Մոնակոյում կներկայացնի Մաեստրոյի ստեղծագործությունները»

Մարտի 1, 2022

Մշակութային լուրեր

(Մաս 3)
Միջազգային համագործակցություն և թանգարանի 2022 թվականի կարևոր ծրագրերը

Սերգեյ Փարաջանովի թանգարանի տնօրեն Անահիտ Միքայելյաի տեղեկացմամբ՝ միջազգային համագործակցության շրջանակում 2022 թվականի մարտի 22-ին թանգարանը Ֆրանսիայի Մոն դե Մարսան քաղաքում կբացի ժամանակավոր ցուցահանդես, որը կգործի մինչև հունիսի 19-ը:

«Ցուցադրությունը կիրականացվի Մոն դե Մարսանում անցկացվող «Երազ» փառատոնի շրջանակում: Կցուցադրվեն Փարաջանովի ստեղծագործությունները, ինչպես նաև Փարաջանովի «Բանտային» կամ «Էսքիզների» թեմաներով կներկայացնեմ զեկուցում: Ուրախ եմ, որ զեկուցման ընթացքում կարող եմ ներկայացնել ոչ միայն փարաջանովյան ստեղծագործությունները, այլև ներկայացնել Հայաստանը: Այնուհետև Մոնակոյում՝ Մոնտե Կառլոյում «Հայկական երաժշտության օրերի» շրջանակում կբացվի Փարաջանովի ստեղծագործությունների ցուցահանդես: Թանգարանը փարաջանովյան ստեղծագործությունների լուսանկարները տրամադրել է կազմակերպիչներին, որոնք էլ կտպեն այն և կցուցադրեն թվային ձևաչափով:

Միջազգային համագործակցության շրջանակում տարվա ընթացքում նախատեսում ենք նաև հանդիպում Մոսկվայի Ա. Ս. Պուշկինի անվան թանգարանի ղեկավարության հետ: Այս ուղղությամբ նախնական քննարկումներ արդեն ունեցել ենք: Զավեն Սարգսյանի ցանկությունն էր՝ Փարաջանովի ծննդյան 100-ամյակին նվիրված ցուցահանդես բացել Պուշկինի թանգարանում»,- տեղեկացրել է Անահիտ Միքայելյանը և հավելել, որ թանգարանի էքսկուրսավար Լուսինե Գևորգյանը աշխատում է թեմաների մշակման ուղղությամբ՝ փարաջանովյան թեմաներով այն արվեստագետների հետ հարցազրույցների անցկացման համար, որոնք ապրում են աշխարհի տարբեր վայրերում և այս կամ այն կերպ առնչություն ունեն Փարաջանովի անվան հետ:

Խոսելով միջազգային համագործակցության այն ծրագրերի մասին, որոնք դեռևս գաղափարի մակարդակում են՝ թանգարանի տնօրենը կարևորել է Սալվադոր Դալիի և Պիկասոյի թանգարանների հետ համագործակցությունը, որը սկզբնական փուլում կլինի առցանց: Այս ձևաչափով գործակցության շրջանակում արդեն կնախանշվեն և կքննարկվեն համատեղ ծրագրերն ու միջոցառումները:

Արդի տեխնոլոգիաները՝ Փարաջանովի թանգարանում

Թանգարանի այն սրահում, որտեղ ցուցադրվում էին Փարաջանովի բանտային տարիների ստեղծագործությունները, 2022 թվականի հունվարի 9-ին՝ Փարաջանովի ծննդյան օրը, կայացել է «Փարաջանովը՝ տանը» վիդեոինստալացիայի շնորհանդեսը, որի հեղինակն է նիդեռլանդահայ կինոռեժիսոր, նկարիչ Դավիդ Բարոնյանը:

«Նախագիծը պետք է գործարկվեր դեռևս 2020 թվականին, և պայմանագիրը կնքվել էր թանգարանի հիմնադիր-տնօրեն Զավեն Սարգսյանի հետ: Սակայն համաճարակային իրավիճակով պայմանավորված՝ ծրագիրը կյանքի կոչվեց 2 տարի անց: Ծրագիրը 8 մասից բաղկացած վիդեոինստալացիա է, որի միջոցով «կենդանանում են» Փարաջանովի ստեղծագործությունները՝ նոր շունչ ու մոտեցում հաղորդելով Մաեստրոյի արվեստին»,- ներկայացրել է տնօրենը:

Հուշանվերային հավաքածուն համալրվում է

Սերգեյ Փարաջանովի թանգարանի հուշանվերները բազմապիսի են: Այս տարի դրանք համալրվել են նոր տեսականիով։ Ստեղծվել են յուրօրինակ զարդեր Փարաջանովի արվեստով ոգեշնչվելու արդյունքում: Ձեռագործ այս զարդերը յուրօրինակ և հաճելի անակնկալ կլինեն փարաջանովյան արվեստը գնահատողների համար:

Նյութի աղբյուրը. ՀՀ կրթության, գիտության, մշակույթի և սպորտի նախարարություն