«Նպատակ ունենք ձևավորելու սպորտային հասարակություն». Կարեն Գիլոյանը մասնակցել է սպորտի միջազգային օրվան նվիրված ասուլիս-քննարկմանը

Ապրիլի 7, 2022

Սպորտային լուրեր

Ապրիլի 6-ին «Սպորտի միջազգային օրվա» կապակցությամբ «Այբ» դպրոցում տեղի է ունեցել «Սպորտ և կայուն զարգացում» խորագրով թեմատիկ ասուլիս-քննարկում, որի նպատակն էր բարձրաձայնել սպորտի և առողջ ապրելակերպի կարևորության մասին, ներկայացնել դաշտի հիմնախնդիրներն ու վերջիններիս լուծման համար ոլորտի ներկայացուցիչների և շահագրգիռ կողմերի միջև ստեղծել համագործակցության յուրահատուկ հարթակ։

Միջոցառմանը ներկա էին ՀՀ ԿԳՄՍ նախարարի տեղակալ Կարեն Գիլոյանը, Հայաստանում UNICEF-ի ներկայացուցիչ Քրիսթինե Վայգանդը, Հայաստանի ազգային օլիմպիական կոմիտեի փոխնախագահ Արմեն Գրիգորյանը, Հայաստանի ֆիզիկական կուլտուրայի և սպորտի պետական ինստիտուտի ռեկտոր Դավիթ Խիթարյանը, «Այբ» դպրոցի գործադիր տնօրեն Դավիթ Սահակյանը, «Մայլեռ Մաունթայն Ռեզորթ» նախագծի հիմնադիր, «Այբ» դպրոցի հոգաբարձուների խորհրդի անդամ Տիգրան Հարությունյանը, սպորտի ոլորտի փորձագետներ, մարզաձևերի հանրապետական ֆեդերացիաների, մարզական կառույցների ներկայացուցիչներ, միությունների ղեկավարներ և ֆիզիկական դաստիարակության ծրագրերի իրագործմամբ զբաղվող այլ շահագրգիռ կողմեր։

ՀՀ ԿԳՄՍ նախարարի տեղակալ Կարեն Գիլոյանը կարևորել է սպորտի զարգացմանն ու մասսայականացմանն ուղղված ծրագրերը, որոնք իրականացվում են ՀՀ կառավարության և ԿԳՄՍ նախարարության կողմից. «Ողջունելի է, որ սպորտն ուշադրության կենտրոնում է: Այսօր ավելի շատ պետք է ուշադրություն դարձնենք սպորտի տարածմանը։ Մեր կողմից իրականացվող բազմաթիվ ծրագրեր կան, որոնք ուղղված են ոչ միայն պրոֆեսիոնալ սպորտի զարգացմանը, այլև հենց սպորտի մասսայականացմանը։ Առաջիկայում նախատեսում ենք հետաքրքիր մրցաշարեր և օլիմպիադաներ, որոնց կարող են մասնակցել բոլոր շարքային քաղաքացիները։ Սրանով իսկ նպատակ ունենք զարգացնելու ու ձևավորելու սպորտային հասարակություն։ Հուսով եմ՝ կարող ենք արդյունավետ համագործակցության եզրեր գտնել նաև մասնավոր հատվածի հետ, քանի որ բոլորիս ընդհանուր նպատակը մեկն է»։

Միջոցառման նախաձեռնող, «Մայլեռ Մաունթայն Ռեզորթ» նախագծի հիմնադիր Տիգրան Հարությունյանի խոսքով՝ սպորտի մասսայականացումն ու սպորտային հասարակության ձևավորումն այսօր կարևոր հիմնախնդիրներից են. «Կարծում եմ՝ սպորտը հենց այն ոլորտն է, որի զարգացումն ավելի արդյունավետ կլինի համագործակցությունների շնորհիվ, մասնավորապես՝ պետություն-մասնավոր հատված գործակցության արդյունքում կարող ենք հասնել ցանկալի արդյունքի»։

Հարությունյանը շեշտել է՝ «Մայլեռ Մաունթայն Ռեզորթում» շեշտը հիմնականում դրվելու է ձմեռային սպորտաձևերի վրա, բայց իրենց նպատակները շատ ավելի հեռահար են:

Հայաստանում UNICEF-ի ներկայացուցիչ Քրիսթինե Վայգանդը նշել է, որ սպորտն աշխարհը փոխելու և մարդկանց միավորելու ներուժ ունի: Վայգանդի խոսքով՝ այն հզոր գործիք է կայուն զարգացման, համերաշխության և հասարակության բոլոր անդամների նկատմամբ հարգանք սերմանելու համար. «Հուսով եմ՝ մեր այսօրվա քննարկումը երեխաներին և երիտասարդներին հնարավորություններ կընձեռի իրենց համայնքներում սպորտով զբաղվելու գործում»:

«Այբ» դպրոցի գործադիր տնօրեն Դավիթ Սահակյանն էլ կարևորել է սպորտի դերը՝ որպես կրթության կարևոր բաղադրիչ դիտարկելու անհրաժեշտությունը. «Կրթության տեսանկյունից սպորտն անձի, առողջ հասարակության կերտման ամենակարևոր և ազնիվ գործիքներից է։ Մեր օրերում ժամանակակից երեխաների համար ամեն ինչ ավելի դինամիկ ու արագ է, նրանք կորցնում են երկարաժամկետ խնդիրների լուծման կարողությունը, և հենց այստեղ է առավել կարևորվում սպորտը, որը բնավորություն և տեսակ է ձևավորում։ Սպորտը պետք է լինի դաստիարակության առաջնային բաղադրիչներից մեկը»։

Ֆեդերացիաների, մարզական տարբեր կառույցների ներկայացուցիչների մասնակցությամբ տեղի է ունեցել նաև քննարկում առաջիկայում հնարավոր համագործակցությունների ու նախաձեռնությունների վերաբերյալ։

Նյութի աղբյուրը. ՀՀ կրթության, գիտության, մշակույթի և սպորտի նախարարություն