Բուհական համակարգում անգլերենով դասապրոցեսի կազմակերպման խնդիրներն ու հնարավորությունները

Ապրիլի 7, 2022

Լուրեր կազմակերպություններից

Բրիտանական խորհրդի հայաստանյան մասնաճյուղն այսօր կազմակերպել էր աշխատանքային քննարկում՝ «Բուհական համակարգում անգլերեն լեզվով դասապրոցեսի կազմակերպման գործընթացում առկա խնդիրներն ու հնարավորությունները» թեմայով:

Միջոցառմանը մասնակցել են ՀՀ կրթության, գիտության, մշակույթի և սպորտի նախարարի տեղակալներ Արթուր Մարտիրոսյանը և Կարեն Թռչունյանը, ԿԳՄՍՆ աշխատակիցներ, բուհերի ներկայացուցիչներ:

Միջոցառման մասնակիցներին ողջունել է ԿԳՄՍ նախարարի տեղակալ Արթուր Մարտիրոսյանը՝ շնորհակալություն հայտնելով Բրիտանական խորհրդի հայաստանյան մասնաճյուղին նախարարության հետ արդյունավետ համագործակցելու համար: Փոխնախարարը գոհունակություն է հայտնել, որ հանդիպմանը ներկա են պետական և ոչ պետական բուհերի ներկայացուցիչներ: Նա տեղեկացրել է, որ «Կրթության զարգացման՝ մինչև 2030 թվականը պետական ծրագրի» և «Բարձրագույն կրթության և գիտության մասին» օրենքի նախագծերում ամրագրվել են մի շարք կարևոր շեշտադրումներ՝ բուհերի միջազգայնացման և օտարերկրյա ուսանողների ներգրավման առումով: Փոխնախարարի խոսքով՝ որպես թիրախ սահմանվել է ՀՀ բուհերում արտերկրի ուսանողների թվի կրկնապատկումը, և բուհերի միջազգայնացման տեսանկյունից պետությունը շահագրգիռ է այդ թվի ավելացմամբ, սակայն դա չպետք է լինի կրթության որակի հաշվին:

«Այս քննարկումն ուղղված է հասկանալու բուհերում անգլերենով դասապրոցեսի կազմակերպման գործընթացում առկա խնդիրները և պետության կողմից առաջադրվող պահանջները: Մասնավորապես, ո՞րն է պետության դերն այս խնդրում. լինել ուղղակի նորմեր սահմանո՞ղ, թե՞ կարողությունների զարգացման այլընտրանքային հնարավորություններ ստեղծող: Ըստ այդմ՝ արդյո՞ք անհրաժեշտ է վերանայել պետության կողմից առաջադրվող պահանջները, և վերանայման դեպքում որքանո՞վ են դրանք իրատեսական»,- նշել է Արթուր Մարտիրոսյանը՝ տեղեկացնելով, որ օտարերկրյա ուսանողների ընդունելության, տեղափոխման և վերականգնման կարգերը կփոխվեն՝ որակյալ կրթական ծառայությունների մատուցման նպատակով:

Բուհական համակարգում անգլերենով դասապրոցեսի կազմակերպման գործընթացում առկա խնդիրները և պետության կողմից առաջադրվող պահանջները ներկայացրել է ԿԳՄՍ նախարարի տեղակալ Կարեն Թռչունյանը: Նա նշել է, որ անգլերենով դասապրոցեսի կազմակերպման գործընթացում պետք է սահմանվի որոշակի չափելի արդյունք: Նա փաստել է, որ բուհերի ծրագրային հավատարմագրման տեսանկյունից դիտարկելիս պետությունը պետք է ունենա կարգավորող գործառույթ, իսկ բուհն ապահովի դասախոսների գիտելիքների՝ լեզվական և մասնագիտական համապատասխան իմացության մակարդակ, այդ թվում՝ շարունակական վերապատրաստումների և որակավորումների բարձրացման միջոցով: Նա խնդրել է հանդիպման մասնակիցներին հանդես գալ համապատասխան առաջարկներով և դիտարկումներով:

Բրիտանական խորհրդի հայաստանյան մասնաճյուղի անգլերեն ծրագրերի ղեկավար Ադդէ Հովասափյանը ներկայացրել է «Անգլերենը՝ որպես դասավանդման լեզու» հետազոտության արդյունքները: Նրա խոսքով՝ տվյալները հավաքագրվել են ԿԳՄՍ նախարարության, բուհերի և հետբուհական հաստատությունների ներկայացուցիչների հետ հանդիպումների, 3 բուհ այցերի, դասերի դիտարկումների և խմբային քննարկումների, ինչպես նաև 18 բուհում 383 մասնակցի (247 ուսանող և 127 դասախոս) շրջանում հարցումներ իրականացնելու միջոցով: Որպես հետազոտության արդյունք՝ մատնանշվել է դպրոցների շրջանավարտների անգլերենի ցածր մակարդակը, օտարերկրյա ուանողների փոքր թիվը, անգլերենի միջազգային թեստերի սահմանափակ կիրառումը, ուսանողների և դասախոսական կազմի անգլերենի բարելավման շարունակական կարիքը, ոչ ինտերակտիվ դասավանդման մոտեցումը, համապատասխան ռեսուրսների համալրումը և այլն:

Որպես առաջարկներ՝ ներկայացվել են նախարարության կողմից դպրոցական ուսումնական ծրագրերի վերանայումը, անգլերենի միջազգային թեստի կիրառումը, անգլերենի և ակադեմիական հմտությունների հավելյալ դասավանդումը և այլն: Նա շեշտել է, որ Բրիտանական խորհրդի հայաստանյան մասնաճյուղը պատրաստակամ է աջակցելու ՀՀ բուհերին՝ անգլերենի միջազգային թեստերի կազմակերպման և դասախոսական կազմի մասնագիտական շարունակական զարգացման գործում: Ադդէ Հովասափյանը հույս է հայտնել, որ քննարկումից հետո կողմերը կգտնեն համագործակցության նոր եզրեր և կշարունակեն համատեղ աշխատանքը:

Հանդիպման մասնակիցները հանդես են եկել մի շարք առաջարկություններով և դիտարկումներով: Նրանք նաև մի շարք հարցեր են ուղղել կրթության ոլորտի պատասխանատուներին և Բրիտանական խորհրդի ներկայացուցիչներին, որոնց տրվել են հանգամանալից պարզաբանումներ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն