Կայացել է Զինաիդա Սիմոնյանի անվան հրաձգության հուշամրցաշարը. հայտնի են հաղթողները

Մայիսի 3, 2022

Սպորտային լուրեր

Ապրիլի 29-ից մայիսի 1-ը 10-րդ անգամ անցկացվել է ԽՍՀՄ, Եվրոպայի, աշխարհի բազմակի չեմպիոնուհի և 53 ռեկորդների հեղինակ Զինաիդա Սիմոնյանի անվան հրաձգության ավանդական հուշամրցաշարը:

Հուշամրցաշարին մասնակցել են Երևանի, Գյումրիի հրաձգության մանկապատանեկան մարզադպրոցների, Հրաձգության հանրապետական մարզադպրոցի, Մխիթար Սեբաստացի կրթահամալիրի և Վանաձորի թիմերը:

Մրցաշարի մասնակիցները, առանց տարիքային սահմանափակման, մրցել են 10 մ (4․5 մմ) հեռավորությունից հետևյալ զինատեսակներից՝ հրացան, ատրճանակ և վազող թիրախ։

Զինաիդա Սիմոնյանի անվան հրաձգության հուշամրցաշարի օդամղիչ հրացան, 10 մ, 60 կրակոց տղամարդկանց պայքարում հաղթող է ճանաչվել Նարեկ Դեմիրխանյանը, իսկ կանանց պայքարում՝ Միլենա Պողոսյանը: Օդամղիչ ատրճանակ, 10 մ, 60 կրակոց մրցաձևում տղամարդկանց պայքարում ոսկե մեդալակիր է դարձել Բենիկ Խլղաթյանը, իսկ կանանց պայքարում՝ օլիմպիական խաղերի մասնակից Էլմիրա Կարապետյանը: Վազող թիրախ, 10 մ, նորմալ վազք, 30+30 կրակոց մրցաձևում հաղթողներ են ճանաչվել Հովհաննես Մարգարյանն ու Գոհար Հարությունյանը:

Վազող թիրախ, 10 մ, նորմալ վազք, 2 x 20 կրակոց, տղամարդկանց պայքարում էլ 1-ին հորիզոնականը զբաղեցրել է Հովհաննես Մարգարյանը, իսկ կանանց պայքարում՝ Արուսյակ Գրիգորյանը:

Մրցանակային տեղեր զբաղեցրած մարզիկները ստացել են դիպլոմներ, մեդալներ և դրամական պարգևներ։ Պարգևատրվել են նաև հաղթող մարզիկների անձնական մարզիչները։

Հանձնաժողովի որոշմամբ՝ մրցման ուժեղագույն մարզիկ է ճանաչվել Հովհաննես Մարգարյանը, ով Հայաստանի հրաձգության ֆեդերացիայի նախագահ Արթուր Հովհաննիսյանի կողմից ստացել է հավաստագիր և դրամական պարգև։

Եվրոպայի 2022 թվականի առաջնությանը մեդալներ նվաճած մարզիկները, ինչպես նաև Էլմիրա Կարապետյանը և նրանց անձնական մարզիչներն արժանացել են նվերների և դրամական պարգևների:

ՀԱՕԿ պատվավոր փոխնախագահ Դերենիկ Գաբրիելյանն էլ օլիմպիական չեմպիոն Վլադիմիր Ենգիբարյանի 90-ամյա հուշամեդալ է շնորհել ՀՀՖ նախագահին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն