«Եկեք խոսենք հայերեն»

Փետրվարի 23, 2017

Դպրոցական անցուդարձ

Մայրենի լեզվի միջազգային օրը առիթ է սթափվելու, մտածելու դարերով պահպանված ու մեզ ժառանգած ոսկեղենիկ հայերենը  մեր սերունդներին անաղարտ փոխանցելու մշակույթի մասին: 

Փետրվարի 21-ին տոնական տրամադրություն էր թևածում Վարդենիկի Ա. Օհանյանի անվան N 2 հիմնական դպրոցի հանդիսությունների դահլիճում: 6բ դասարանը (դասղեկ՝ Մ. Մանուկյան) միջոցառում էր կազմակերպել Մայրենի լեզվի միջազգային օրվա կապակցությամբ՝ ևս  մեկ անգամ արժևորելու, սեր, հպարտություն և հոգատարություն դրսևորելու մեր ժառանգության մեծագույն գանձի՝ մայրենիի  նկատմամբ:

Լեզուն համարվում է բոլոր ազգերի կարևորագույն, հատկապես մշակույթային ժառանգության պահպանման ու զարգացման այն գործիքը, որով սերունդները պահպանում են իրենց ազգությունը, և եթե չլիներ հայոց լեզուն, մենք՝ հայերս, վաղուց կորցրած կլինեինք մեր ազգային դիմագիծը: Մեզանից յուրաքանչյուրը պետք է փորձի պահպանել հայոց լեզուն՝ ուղղակի գեղեցիկ խոսելով. առանց ժարգոնային, տգեղ կամ օտար լեզուներից մեջբերումներ անելով:

Երեխաները իրենց խոսքում նշեցին  տոնի նշանակությունը և շնորհավորհեցին  բոլորին՝ նշելով որ հայերենը գեղեցկագույն, ճկուն և բազմաշերտ լեզու է, որը հայոց պետականության, միասնության և ամրության հիմնասյուներից է: Այնուհետև երեխաները ներկայացրեցին հայերենի և հայոց գրերի ստեղծման պատմությունը՝ արտաբերելով այբուբենը մոմերի ուղեկցությամբ, հնչեցրին բանաստեղծություններ, մեջբերեցին գնահատանքի ու հիացմունքի խոսքեր, հանդես եկան մայրենի լեզվի մասին մեծերի իմաստուն ասույթներով, ներբող-բանաստեղծություններով, երգ ու պարով: Գեղեցիկ ասմունքը ուղեկցվում էր Առնո Բաբաջանյանի հոգեզմայլ երաժշտությամբ:

Տոնական մթնոլորտն ապահովված էր: Մ. Մանուկյանին ու բոլոր մասնակիցներին իրենց գոհունակությունն ու երախտագիտությունը արտահայտեցին ՄԿԱ գծով փոխտնօրեն Գ. Միլիտոնյանն ու ներկաները՝ մայրենին փայփայելու, այդքան մեծ սիրով ու նվիրումով ներկայացնելու համար:

Եկե´ք խոսենք հայերենով և այնպես, որ այն լույս տարածող լամպի պես լուսավորի շուրջբոլորը և  պանդուխտին տուն կանչող ճաճանչափայլ փարոս դառնա: