Գնահատման համակարգի բարելավմանը նվիրված երկօրյա համաժողովը

Փետրվարի 24, 2017

Պաշտոնական

Մասնագիտական կրթության որակի ապահովման ազգային կենտրոնի նախաձեռնությամբ  կրթության որակի շաբաթվա շրջանակներում այսօր Հայաստանի ամերիկյան համալսարանում մեկնարկել է «Որակը լսարանում՝ գնահատման համակարգի բարելավում» թեմայով երկօրյա համաժողովը:

Ողջունելով համաժողովի մասնակիցներին՝ Շվեյցարիայի հավատարմագրման և որակի ապահովման գործակալության նախագահ, Բարձրագույն կրթության որակի ապահովման եվրոպական ասոցիացիայի (ANQA)  խորհրդի անդամ Քրիստոֆ Գրոլիմունդը հայտարարել է, որ Մասնագիտական կրթության որակի ապահովման ազգային կենտրոնը դարձել է ANQA լիիրավ անդամ: Նշվել է, որ Հայաստանը տարածաշրջանում առաջին երկիրն է, որ անդամակցում էANQA-ին:

ՀՀ կրթության և գիտության նախարար Լևոն Մկրտչյանը, շնորհավորելով ՈԱԱԿ-ին և կրթական համակարգի ներկայացուցիչներին ANQA անդամակցության առթիվ, նշել է. «Փոքր երկրները կարող են իրենց կրթությունը զարգացնել միմիայն մեծ քաղաքակրթական դաշտում: Եվ անդամակցությունը եվրոպական կառույցին նաև վստահության քվե է այն գործընթացներին, որ այսօր տեղի են ունենում Հայաստանի բարձրագույն կրթության համակարգում»,-նշել է նախարարը` կարևորելով նաև առաջիկայում սպասվող ծրագրային հավատարմագրման գործընթացը: «Չի կարող լինել ինստիտուցիոնալ հավատարմագրում` առանց ծրագրային հավատարմագրման: Այն շատ կարևոր է և ուղղակիորեն առնչվում է որակին»,-շեշտել է Լևոն Մկրտչյանը:

ՈԱԱԿ տնօրեն Ռուբեն Թոփչյանի խոսքով` ANQA-ին անդամակցությունը նշանակում է, որ  Հայաստանում կարելի է դնել նման հավակնոտ նպատակներ և հասնել դրան:

Համաժողովի մասնակիցները  քննարկել են, թե ինչպիսի գնահատում են ակնկալում բուհից ուսանողը,  գործատուն և դասախոսը:  Գործատուները կարևորել են, որ ուսանողներն իրենց մոտ գան որոշակի գործնական հմտություններով, իսկ որպես դրա ապահովման միջոց` առաջարկել, որ իրենք էլ ներգրավվեն ուսանողի գնահատման գործընթացում:

«Որակը լսարանում՝ գնահատման համակարգի բարելավում» թեմայով համաժողովի շրջանակներում վաղը կներկայացվեն կլաստերային աուդիտի  նպատակը, չափանիշները, ոլորտները: Կհաջորդեն ոլորտային աշխատաժողովներ` նվիրված կլաստերային աուդիտի չափանիշների քննարկմանը: Կներկայացվի նաև որակի ապահովման ոլորտի միջազգային փորձը` Ռուսաստանի, Մեծ Բրիտանիայի, Շվեյցարիայի օրինակով:

Նյութի աղբյուրը. ՀՀ կրթության և գիտության նախարարություն