Անմահ Լոռեցին

Փետրվարի 23, 2023

Դպրոցական անցուդարձ

Գեղարքունիքի մարզի Լճաշեն գյուղի Ա. Տեր- Գրիգորյանի անվան միջնակարգ դպրոցում անցկացվեց գրական-երաժշտական ցերեկույթ՝ «Հանճարեղ Լոռեցին» խորագրով` նվիրված Ամենայն հայոց բանաստեղծ Հ. Թումանյանի ծննդյան 154-ամյակին: Դպրոցում տոնական տրամադրություն էր: Հ. Թումանյանի շունչն էր ամենուր…

Անմահ, հավերժական Թումանյան…

Ամենայն հայոց բանաստեղծ, մտավորական, որի ծովածավալ գրական երկերը` հեքիաթները, լեգենդները , պոեմները, պատմվածքներն ու քառյակները հայ գրականության մեջ ինքնատիպ են` գրված պարզ ու հյութեղեն լեզվով, որոնք ընթերցողի մեջ սերմանում են մարդկային վեհ արժեքներ` ազնվություն, հայրենասիրություն, բարություն, ճշմարտացիություն, սեր:

«Անուշ» օպերայի հոգեթով երաժշտության ներքո բեմադրվեց հեզաճկուն պար: Դպրոցի «Փոքրիկ երգիչներ» երգչախումբը /խմբակավար` Մարիետա Վարդանյան/ կատարեց «Ա՜խ, ինչ լավ է սարի վրա» և «Ամպի տակից» երգերը:

Բեմականացվեցին «Անխելք մարդը», «Մի կաթիլ մեղրը», «Սուտասանը», «Բարեկենդանը», «Գիքորը», «Կիկոսի մահը», «Թագավորն ու չարչին» սքանչելի, գողտրիկ գործերը: Հեքիաթներն ընդմիջվեցին «Ախթամար» և «Տիեզերքում աստվածային» երգերով:

Գրական-երաժշտական ցերեկույթը կազմակերպել էին Մայրենի, Հայոց լեզու, Գրականություն և  Գրաբար առարկաների մեթոդական միավորումը /նախագահ` Ջեմմա Դանիելյան/, դաստիարակչական աշխատանքների կազմակերպիչ Ծովինար Կարապետյանը, 5-9-րդ դասարանների դասղեկները:

Թումանյանը ժողովրդական հանճարի փայլատակումն էր: Նրա բանահյուսական հերոսները` Անուշը, Սարոն, Քաջ Նազարը, Սուտլիկ որսկանը… ժողովրդի ծոցից դուրս եկած մարդիկ էին: Թումանյանի երկերը ժամանակի հետ ավելի են փայլում, ինչպես ադամանդ, անգին քար,մարգարիտ ու գոհար, որ երբեք չեն խամրելու:

Միջոցառումն ամփոփեց դպրոցի տնօրեն Աիդա Մուրադյանը հորդորեց աշակերտներին շատ ընթերցել և զգույշ ընթերցել Թումանյանի անկրկնելի գործերը: Ամեն ինչ անցնում է, ամենքն անցավոր է, գործն է անմահ, մնայուն:

Ամեն անգամ Թումանյանի գործերը ընթերցելիս կարծես մի կաթիլ ես ըմպում նրա օվկիանոս գրական ժառանգությունից:

Հ. Թումանյանը «Երջանիկ ակունքներին երազուն» կանչեց ու անց կացավ, բայց իր կանչն ու գործը թողեց իբրև իր անմահության հավերժական վկայություն:

Ա.Մուրադյան
Լճաշեն գյուղի Ա.Տեր-Գրիգորյանի անվան միջնակարգ դպրոցի տնօրեն