«Մեր մեծերը» ծրագրի շրջանակներում կազմակերպված եզրափակիչ միջոցառումը

Մարտի 30, 2017

Դպրոցական անցուդարձ

Միջոցառում, որը դարձավ սկիզբ. մեծանուն գրող Մ.Գալշոյանի թոռնիկը՝ փոքրիկ Մուշեղը, ով պատվավոր հյուրերից էր, իր երգով ազդարարեց այդ սկիզբը:

Երևանի Մ.Գալշոյանի անվան հ.148 ավագ դպրոցի տնօրեն Հ.Դավթյանն այս ծրագրի կատարման աշխատանքները համակարգելիս համատեղեց երկու կարևոր պահանջ՝ կազմակերպել ասմունքի մրցույթ՝ նվիրված պոեզիայի միջազգային օրվան` հեղինակ ընտրելով Վահան Թեքեյանին:

Հայտարարություններ ուղարկվեցին հարևան դպրոցներ. յուրաքանչյուր դպրոցում անցկացվեց մրցույթի առաջին փուլը, իսկ եզրափակիչը` մեր դպրոցում:

Ժյուրիի կազմում էին Վ.Թեքեյանի կենտրոնի ծրագրերի բաժնի պատասխանատու Սեդա խաչատրյանը, Արաբկիր համայնքի կրթության բաժնի աշխատակից տիկին Գայանե Աղասյանը և Երևանի հ.56 հիմնական դպրոցի ուսուցչուհի տիկին Ազատյանը:

Նրանց որոշմամբ առաջին տեղը գրավեց և պատվոգրի, հուշանվերի արժանացավԵրևանի հ.51 դպրոցի VIII դասարանի աշակերտուհի Գայանե Մանուկյանը, 2-րդ տեղը զբաղեցրեց Երևանի հ.48 ավագ դպրոցի XII դասարանի աշակերտ Արման Բաբայանը և 3-րդ տեղը` Երևանի հ.54 ավագ դպրոցի IX դասարանի աշակերտուհի Նունե Ալեքսանյանը:

Մրցույթի մյուս մասնակիցները ստացան շնորհակալագրեր և ջերմ ու սրտաբուխ մաղթանքներ: Սակայն այս ամենն ամբողջը չէ. ուսուցչուհի Լուսինե Եղոյանի և կազմակերպիչ Աիդա Չիլինգարյանի ջանքերով մատուցվեց հոգեթով պոեզիայի ժամը`«Ծանոթ և անծանոթ սփյուռքահայ գրողներ» վերնագրով:

Դպրոցի փոխտնօրեն Անահիտ Գևորգյանը համացանցային որոնումների արդյունքում գտել էր պոլսահայ գրող Ռոպէր Հատտէճեանին և ջերմ նամակով ողջունել նրան։ Պարոն Հատտէճեանը պատասխան ուղղերձ ուղարկեց գալշոյանականներին և դպրոցի ուսուցիչներին, որը ընթերցվեց հենց միջոցառման ընթացքում և այն դարձրեց ավելի շոշափելի՝ կարմիր թել դառնալով անցյալի և ներկայի միջև։

Ամենաուշագրավն ու ուրախալին այն է, որ մեր դպրոցն այսուհետ ունի իր հիմնը, որի առաջին կատարումը եղավ այսօր և խանդավառեց դահլիճում նստած յուրաքանչյուրին:

«Մեր մեծերը» ծրագրի ավարտին կրկին ուզում ենք հիշել հանճարեղ Պարույր Սևակի տողերը.

Ուշ–ուշ են գալիս, բայց ոչ ուշացած,
Ծնվում են նրանք ճիշտ ժամանակին:

Երևանի Մ.Գալշոյանի անվան հ.148 ավագ դպրոց