Ոգեկոչման  միջոցառում

Ապրիլի 7, 2017

Դպրոցական անցուդարձ

Չարենցավանի  Ամենայն  Հայոց  Կաթողիկոս  Վազգեն  Ա-ի  անվան  N 3 հիմնական   դպրոցում  ապրիլի  5-ին  տեղի   ունեցավ  ապրիլյան  պատերազմի  հերոսներին  նվիրված  ոգեկոչման  միջոցառում, որին  ներկա  էին  ապրիլյան  պատերազմի  մասնակից զինվորները: Դպրոցի  աշակերտական  խորհուրդը  մեծ  ոգևորվածությամբ  էր  սպասում  հրավիրված  հերոսներին,ովքեր  վտանգի  տակ  դնելով  իրենց  երջանկությունը,  մինչև  վերջ  պայքարեցին հանուն  իրենց  հայրենիքի:

Քառօրյա պատերազմի ու նրա հերոսների մասին խոսվում  է   ու   դեռ  կխոսվի: Նրանց նվիրված երգերն ու խոսքերը ևս շարունակական բնույթ կկրեն, քանի որ նրանք հերոսներ են, որոնց համար հայրենիքը ֆիզիկական գոյության համար նախատեսված վայր չէր, այլ հայրենիք ասվածն իր մեջ կրում է մի վեհ գաղափար՝ սեր հայրենիքի հանդեպ, որը մղում է անձնազոհության, հանուն այն կյանքերի, որոնք նրանց կյանք են տվել ու ապրեցրել...                                                                                                     

-  Ժամանակների պատմության մեջ  ծնվեց  մի  ազգ, որին  հայ   կոչեցին: Բարձրյալն այդ ազգին  տվեց   աչք, բայց   չասաց   միայն   երկինք   նայիր, ձեռքեր   տվեց,բայց  չասաց  ձեռքերդ  միայն  երկինք     կարկառիր   և    ինձ   երկրպագիր, սիրտ   տվեց, բայց  չասաց  միայն   սիրո  համար տրոփիր, մենք  գիտենք,  որ  աչքը  նաև   թշնամուն  նայելու  համար է, ձեռքը  թշնամուն   հարվածելու և պաշտպանվելու  համար է, սիրտը  վտանգը  զգալու և ընդվզելու  համար  է, մենք  սիրեցինք  այդ  գործը և սիրով   արեցինք, որովհետև  մեզ  հայ  են  ասում:

Թող  Աստված  պահապան  լինի  հայ  զինվորին  և  զինվորին  կյանք  տվողին…