«Առաջին անգամ ընտրող»

Ապրիլի 11, 2017

Դպրոցական անցուդարձ

Գավառի ավագ դպրոցում իրականացվեց «Առաջին անգամ ընտրող» նախաձեռնությունը 10-12- րդ դասարանների աշակերտների ակտիվ մասնակցությամբ:  Սեմինարավար ուսուցիչներ Ն. Ղուլոյանը և Ա. Զոլյանը ներկայացրին ծրագրի նպատակներն ու խնդիրները:  Սեմինարի 2-րդ մասը սիմուլյացիոն խաղի միջոցով ընտրական գործընթացի մինի մոդելի կազմակերպումն ու իրականացումն էր: Այդ նպատակով կատարվեց դերային բաշխում՝ թեկնածուներ, հանձնաժողովի անդամներ, վստահված անձինք, դիտորդներ, լրագրողներ, որոնցից յուրաքանչյուրը սեմինարավարների մատչելի մատուցման և ձեռքի տակ եղած ուղեցույցների շնորհիվ իմացան իրենց գործառույթների մասին և հաջողությամբ կազմակերպեցին ընտրական գործընթացը: Ինքնառաջադրված 5 թեկնածուները ներկայացրին իրենց նախընտրական ծրագրերը ՝ դպրոցի, համայնքի և պետության տարբեր հիմնախնդիրներին առնչվող ՝ առաջարկելով լուծման իրենց ուղիները,  տարբերակները: Թեկնածուների բովանդակալից ելույթներին հաջորդեցին լրագրողների ոչ պակաս հետաքրքիր հարցերը, որոնց տրվեցին ինքնատիպ ու սպառիչ պատասխաններ:

Վերջապես հասավ ընտրության սպասված պահը:
Ընտրությունը կազմակերպվեց և իրականացվեց բարձր մակարդակով ՝  ՀՀ Սահմանադրությանն համապատասխան ՝ փակ, գաղտնի, ուղղակի և ժողովրդավարական սկզբունքով: Ձայների մեծամասնությամբ հաղթեց 12-րդ դասարանի աշակերտուհի Մարիամ Հովհաննիսյանը:
Աշխատանքից գոհ էին թե՛ կազմակերպիչները, թե՛ աշակերտները: Բոլորի ջանքերն արդարացված էին:

Գավառի ավագ դպրոցի  պատմության ուսուցչուհի՝    Ա. Զոլյան