Նոր Ջուղայի «Արմեն» կրթահամալիրում ավարտական երեկոն ուներ հայրենասիրական բնույթ

Հունիսի 20, 2023

Սփյուռքի լրատու

Հունիսի 15-ին Սպահանի Նոր Ջուղայի «Արմեն» կրթահամալիրում կազմակերպված միջոցառման հերոսները դպրոցի տարրական հատվածի 6-րդ՝ ավարտական, դասարանի աշակերտներն էին: Այս տարի ավարտական երեկոն ուներ հայրենասիրական բնույթ: Երեկոյին բացման խոսք ասեց դպրոցի տնօրեն Գեղարդ Մանսուրյանը՝ ողջունելով աշակերտներին և հյուրերին, որին հաջորդեցին երեխաների ելույթները: Աշակերտները սկզբից խոսեցին Հայաստանի, Արցախի, հայրենասիրության ու հայրենիքի, հայոց լեզվի պահպանության և սերունդներին փոխանցելու կարևորության մասին: Այնուհետև նրանք հետաքրքիր դրվագներ պատմեցին հայ ազգային հերոսների, գրողների ու երգահանների կյանքից, որոնց դերը անգնահատելի է եղել հայ ժողովրդի պատմության կերտման ու հայապահպանության գործում: Ներկայացրեցին տաղեր Կոմիտասից, արտասանեցին հատվածներ Պ. Սևակից: Երգեցին մի շարք հայրենասիրական, ազգագրական , դպրոցական երգեր: Վերջում երեխաները կատարեցին երդման արարողություն, որը շատ հուզիչ էր: Նրանք երդվեցին պահել ու պահպանել մեր ազգային մշակույթը՝ փոխանցելով սերնդե սերունդ, խոսել ու գրել ոսկեղենիկ հայերենով՝ հայոց գրերը համարելով ազգային հարստություն, և միշտ սատար կանգնել հայրենիքին ՝ լավ սովորելով և պիտանի մասնագետներ դառնալով: 6-րդ դասարանի աշակերտների ելույթից հետո տեղի ունեցավ հանրապետության մակարդակով՝ ողջ տարվա ընթացքում, միջդպրոցական տարաբնույթ մրցույթների մասնակցած և պատվավոր տեղեր զբաղեցրած՝ տարրական դպրոցի սաների պարգևատրման արարողությունը: Միջոցառման ավարտին իրենց խոսքով հանդես եկան Սպահանի Հայոց Թեմի Կրթական Խորհրդի նախագահ Վարուժ Մովսիսյանը և Սպահանի Հայոց Թեմի առաջնորդ, Գերաշնորհ Սիփան ԵՊՍ. Քեչեճյանը՝ հայտնելով իրենց հիացմունքը գեղեցիկ ու բովանդակալից երեկոյի վերաբերյալ: Երեկոն շարունակվեց հյուրասիրությամբ : Այս հրաշալի երեկոյի համար շնորհակալություն ենք հայտնում, Սպահանի Հայոց Թեմի Կրթական Խորհրդին, դպրոցի տնօրինությանը, 6-րդ դասարանի հայոց լեզվի, գրականության ու պատմության ուսուցչուհի Սկարլետ Հայրապետյանին, դպրոցի ուսուցիչներին, աշխատակազմին, ծնողական խորհրդին և բոլոր այն անձանց, ովքեր մասնակցություն են ցուցաբերել միջոցառման կազմակերպան գործում։