Հերթական հեռավար դասերը Սիսիանի ավագ դպրոցի և Մեղրիի թիվ 2, Աճանանի, Հարթաշենի միջնակարգ դպրոցների հետ

Ապրիլի 21, 2017

Դպրոցական անցուդարձ

Հեռավար ուսուցման կարևոր նպատակներից մեկն այն է, որ մենթոր դպրոցներն իրենց տեխնիկական հնարավորությունների սահմանում լաբորատոր աշխատանքների կատարման փորձով կիսվեն այլ դպրոցների հետ: Չէ՞ որ ուսումնական փորձը գիտելիքի աղբյուր լինելուց բացի, բովանդակային նյութը դիտողական դարձնելու անփոխարինելի միջոց է: Առաջնորդվելով այս սկզբունքով՝ Սիսիանի ավագ դպրոցի ֆիզիկայի ուսուցչուհի Բելա Ջիվանշիրյանը լաբորատոր աշխատանքների ձևով հեռավար ուսուցում կազմակերպեց Մեղրի քաղաքի N 2 միջնակարգ դպրոցի հետ:

Ապրիլի 7-ին անցկացված դասի թեման էր «Լրիվ մեխանիկական էներգիայի փոփոխության թեորեմի ստուգումը» մահվան օղակի միջոցով և թեք հարթությամբ սահող մարմնի շփման ուժի աշխատանքի որոշմամբ:

Ապրիլի 14-ի դասի թեման էր «Իմպուլսի և էներգիայի պահպանման օրենքների ստուգումը»:

Բելա Ջիվանշիրյանը ֆիզմաթ հոսքի 10-րդ դասարանի աշակերտների օգնությամբ կատարեց լաբորատոր աշխատանքներ և ունիվերսալ սարքի միջոցով ցուցադրեց մի քանի փորձեր, որոնց միջոցով ամփոփվեց լսարանի տեսական գիտելիքների իմացությունը հորիզոնի նկատմամբ անկյան տակ նետված մարմնի շարժման վերաբերյալ:

Հեռավար ուսուցման դասեր անցկացվեցին նաև աշխարհագրությունից Աճանանի և Հարթաշենի միջնակարգ դպրոցների 8-րդ դասարանների աշակերտների հետ: 8-րդ դասարանի ծրագիրն իր մեջ ամփոփում է հիմնական դպրոցի աշխարհագրության ամբողջ դասընթացը:

Ապրիլի 10-ին հեռավար ուսուցման իր փորձը ներկայացրեց Հարթաշենի միջն.  դպրոցի աշխարհագրության ուսուցչուհի Լ. Մարուքյանը: Դասի թեման էր «Ավստրալիա և Օվկիանիա. ընդհանուր աշխարհագրական ակնարկ»:

Ապրիլի 21-ին հերթական հեռավար դասն էր Աճանանի միջնակարգ դպրոցի 8-րդ դասարանի հետ: Աճանանի դպրոցի ուսուցչուհի Է. Մարկոսյանի առաջարկությամբ Սիսիանի ավագ դպրոցի ուսուցչուհի Օֆիկ Առուստամյանն իր դասավանդման փորձը ներկայացրեց «Ամերիկա. ընդհանուր աշխարհագրական ակնարկ» թեմայով:

Ինտերնետ կապը լավ էր, հեռավար դասերն անցան նպատակային և արդյունավետ: Երեք դպրոցների ներկայացուցիչներն էլ գոհ էին դասի ընթացքից: