Սուրբ հարության տոնը Աբովյանի թիվ 6 ավագ դպրոցում

Ապրիլի 25, 2017

Դպրոցական անցուդարձ

Գարնան հրաշքի ամենավառ գույները, հրաշափառ տոնի ավետաբեր զանգերը՝ մարդու մեջ մարդկայինը, հավատքի մեջ լույսը, հույսի մեջ խոհեմությունը պահպանելու պատգամով, ապրիլի 14-ին իրենց շուրջն էին հավաքել դպրոցի սաներին, ուսուցիչներին, ծնողներին։ Միջոցառումը նվիրված էր Սուրբ Հարության տոնին. ներկա էր Քրիստոնեական դաստիարակության կենտրոնի ներկայացուցիչ Ջ.Ասատրյանը, ում հիացական գնահատանքին արժանացան մասնակիցներն ու միջոցառման կազմակերպիչը՝ Թ.Վարդանյանը։ Միջոցառումն արժևորվեց սցենարային ինքնատիպ լուծումներով, արժանացավ հանդիսատեսի ջերմ ծափողջույններին՝ բեմական հմուտ խաղի և վարպետության շնորհիվ։ Շեշտադրված էր հատկապես մեր հավատքի դաստիարակչական դերն ու նշանակությունը, փառաբանվում էր նրա զորավոր ուժը, չար գործերից առաքինի վարքի, չարից բարու, անմաքուր կենցաղից բարու գործակից դառնալու եղանակներն էին ներկայացվում։ Բեմի վրա հյուսվում էր մի ընտանիքի պատմություն, կենցաղային մի դրվագ, ուր երևում էին հայ տատ ու պապի, անուշ թոռների, հոգատար հայ մոր կերպարները, փոքրերի համով զրույցներն ու օրվան համահունչ խաղերը։ Ուշագրավ էր խիստ գործնական, անընդհատ զբաղված հոր կերպարը, ով անգամ եկեղեցի գնալու ժամանակ չուներ։ Նրան մի կողմից չարի խորհուրդն էր համակում, մյուս կողմից՝ բարու՝ ի դեմս  հատուկ հանդերձանքով  տեսլական կերպարների։ Այդ ամենը դարձավ կատարյալ, երբ բեմի  վրա երևաց Քրիստոսի հրաշափառ կերպարը։ Նրա իմաստալից զրույցներն ու առակները ճշմարիտ լույսով լցրին յուրայինների և հանդիսատեսի հոգին։ Բեմի վրա կանգնած բոլոր մասնակիցները մի-մի լույս էին դարձել. այլ էր օրվա խորհուրդը։ Լույս և հույս էր  հորդում ամենուր և ամենքից։ Թ. Վարդանյանի միջոցառումը դարձավ մեր դպրոցի այն գեղեցիկ ավանդակարգի ինքնատիպ շարունակությունը, երբ կարևոր իրադարձություններն ու հիշարժան օրերը վերածվում են տոնի, վերածվում են իսկական տոնի։

 Դաստիարակչական աշխատանքների կազմակերպիչ՝ Ռ Աֆյան